سهام البارودي – كود//
الحياة ديال بزاف د المغربيات اليوم ولات كاتلخص فواحد الدائرة مفرغة : كولي اللحسة باش تغلاضي و تربي المؤخرة، غلاضيتي؟ صافي ترتشتي ؟ وا نوضي دابا جري عند صوفيا طالوني باش ديري التكميم.
هاد الظواهر ديال اللحسة و التكميم راه الا كايعبرو على شي حاجة فراها الحالة النفسية المرمدة لي كايعيشو فيها بزاف ديال المغربيات اليوم، راه ماشي غير موضة و دايزة لا، هاد سوء التغذية و هاد التعامل لي عند بزاف ديال المغربيات مع الجسد ديالهم هوا دليل على واحد le mal-être كايعيشوه العيالات.
انا شخصيا كانشوف بلي مايمكنش تكون المرا عزيز عليها راسها و تختار انها تمرمدو بين اللحسة و التكميم، كاين واحد الكراهية للجسد هي لي كاتخلي هاد العيالات يلعبو فيه بهاد الطريقة عوض انهم يتهلاّو فيه بالرياضة و الماكلة الصحية، كاين واحد المعاناة نفسية كبيرة كاتخلي العيالات ينتاقمو من الجسد ديالهم عوض انهم يبغيوه و يتعاملو معاع بحب.
شوف فالدول المتقدّمة، شوف فالسويد و لا النرويج و لا المانيا واش غاتلقى المرا كاتكوموندي اللحسة الصحراوية باش تكبّر الزك ؟ طبعا لا حيت هادو المشاكل ديال دول العالم الرابع لي المرا مازال كاتعيش فيهم ضغط كبير من طرف المجتمع لي كايحكم عليها انطلاقا من الصورة ديالها ! المجتمع بغاك آ لالة تكون عندك ترمة كبيرة، و بزازل كبار، سيري كولي اللحسة ! و لكن اللحسة غاتخرج ليك الترمة و غاتخرج ليك معاها الكرش حتى هي حيت الجسم ماكايغلاضش من بلاصة وحدة كيما ماكايضعافش من بلاصة وحدة، صافي دابا غلاضيتي ؟ ولات عندك واحد مولاتي الكرش ديال بوصيحة ؟ واش هاد الحالة ؟ شوفي كي وليتي حالتك ! نوضي جري ديري التكميم دغيا !
المجتمع كايلخص المرا فالكبر ديال الترمة ديالها، المؤثرات كايتباهاو بالعرض ديال الترمة ديالهم، الرجال كايشوفو فالترمة ديالك ، حتى واحد ماكايناقش شي واش ديك المرا قارية شوية ؟ واعية ؟ عندها شي شهادة جامعية ؟ واش ديك المرة بصحة جيدة بعدا ؟ كي دايرة النفسية ديالها ؟ واش جارَة معاها شي عقد من الطفولة و المراهقة ديالها و لا لا ؟
و آطونسيو، المسألة هنا ماشي مسألة معايير جمال و صافي لا ، المعيار الجمالي الطبيعي هو فكرة جمالية ممكن تكون صحية ومتنوعة، ولكن لما يتحول الضغط على النساء باش يطابقوا نموذج واحد صارم، كيبدا المشكل. ماشي كل امرأة عندها نفس البنية الجسدية، وماشي كل واحدة قادرة تتوافق مع هاد القوالب، وهنا كيبدا الألم النفسي، فاش كتولي المرأة كتضطر تجرّد نفسها من حبها وتقديرها لجسدها باش تدخل في تجارب قاسية (لحسة، تكميم، ريجيم قاسي)، كيبان أن الموضوع ماشي غير جمال، بل هو شكل من أشكال الضغط النفسي والاجتماعي اللي كيأثر عليها سلباً.