گود سبور//
داير واحد المغربي هنا فالميريكان ريسطو تقليدي مغربي بقلب بولاية بنسلفانيا الأمريكية، وهذا الشي يقدرو يستغلوه جمهور الوداد الرياضي ملي يجيو للمدينة باش يتفرجو فكأس العالم للأندية، فين يقدرو يلقاو ماكلة مغربية.
وجا ريسطو “مراكش” وهو الاسم ديالو (جا) فعنوان شارع 517 ليثگو بفيلادلفيا، وراه تحل عام 1977 من طرف مغربي عايش فالميريكان، وراه واحد من ليريسطو المعروفين هنا بفيلاديلفيا وكايجيو له الأمريكيين وماشي غير المغاربة والعرب، باش يكلو المأكلة مغربية ويضربو الطاسا ويبدلو الجو.
وقال الجيرون اللي مقابل الريسطو المغربي وهو عراقي، فتصريح لـ”گود”: “هذا المطعم المغربي تأسس عام 1977 وكانو فهاد الأعوام كايجيو له حتى النجوم المريكانيين، وماشي غير المواطنين وهنا كانقدمو للكليان ديالنا 7 الأطباق مغربية تقليدية مقابل 40 دولار للشخص الواحد، فيها شلادا وزعلوك، وفيها البسطيلة والكسكس والدجاج محمر والمروزية، وكاين حتى أتاي بالنعناع، وراه كايجيو عندنا المراكنا بزاف”.
الجيرون ديال الريسطو المغربي هنا ففيلاديلفيا فرح ملي عرف “گود” مغربية وجايا لتغطية مباريات الوداد الرياضي فكأس العالم للأندية، وعبر على الترحيب ديالو بالجمهور الودادي والمغاربة اللي جاو لفيلاديلفيا يتفرجو فالحمرا، وقالهم: “حنا غانشجعو الوداد وبغيناهم يديو حتى الكأس گاع، مرحبا بهم هنا عندنا فريسطو مراكش، راه عندنا الأكل المغربي والطاسا وحتى الشطيح وديال العائلات، ومرحبا بهم يجيو يبدلو الوقت”.
طاقم “گود” فهاد الريسطو مع الميريكانيين عيالات ورجال دراري وبنات كايجيو لهنا ياكلو المانلة مغربية ويضربو الطاسا ويزهاو مع ريوسهم وقالت وحدة منهم فتصريح لـ”گود”: “كانجيو ديما لريسطو مراكش نبدلو الجو هنا الماكلة مغربية تقليدية بحال البسطيلة وكانبدلو الجو ونشطو ونبقاو على بال بالمغرب والثقافة المغربية”.
