كود جنيف ///
وزير الخارجية والتعاون ناصر بوريطة ما كيدعمش الكفاءات النسائية فالبلاد. الدليل البارح لثلاث 24 يونيو 2025 كان تكريم بوجهين بصمو الديبلوماسية المغربية فمجلس حقوق الانسان بجنيف التابع للامم المتحدة: حليمة الوزاني اللي كانت فجنيف فالستينات وكانت رائدة افريقيا وعربيا ثم ماجدة الموتشو من الوجود النسائية الزوينة بجنيف ودابا نيويورك. كان التكريم تم فمعرض فوطوگرافي كبير لعدد كبير من النساء الديبلوماسيات فالعالم. ما حضرش ممثل المغرب فجنيف زنيبر. ما حضرش شي حد اخر من الخارجية. الدول الاخرى للي نساءها فالمعرض حضرو وفرحو بهاد الشي.
غياب بوريطة وقدرتو العجيبة على استغلال نجاحات كديرها اجهزة اخرى، كيبين فشلو. دابا ضارب الطم حقاش ما عندوش علاش يركب.
المرأة المغربية كانت متألقة ف”اليوم الدولي للمرأة في العمل الدبلوماسي”. بوريطة بغى يركب على الموجة من خلال ارقام على تمثيلية المرأة المغربية في الديبلوماسية.
دستورنا كينص على المساواة، ووزارتو كتقول باللي تمكنين المرأة اولوية وطنية. باش؟ بهادوك اللي عاقبتيهمم وجريتي عليهم؟ كيقول باللي 43 بالمائة من العاملين فالجهاز الديبلوماسي نساء. ظاهريا هاد الشي مزيان غير هو فاش خدامات. واش فمراكز القرار؟ واش سفيرات؟ مديرات مركزيات؟
دابا مازال ما وصلناش للثلث فالسفيرات. 22 بالمائة من سفراء سيدنا من النساء. ماشي بوريطة اللي ختار اشهرهن. كيعطيهم سفارات ماشي مهمة لبلادنا، ايلى شفنا سفيرة المغرب فمدريد كريمة بنيعيش وسفيرة المغرب فباريس سميرة سيطايل وقبلهم سفيرتنا اللي كانت فلندن وواشنطن: لالة جمالة، كيبان باللي ماشي بوريطة اللي قتارحهم. ما عندهم علاقة بيه.
يعني غير كيعمر الارقام وصافي
نرجعو للقناصل. حسب الخارجية ف39 بالمائة من القناصل نساء. هنا كاين مشكل. المنطقي ان القناصل اليوم مرشحين يكونو سفيرات. هاد الرقم ديما كان مرتافع فالسابق، غير باش كيجيو مناصب السفير كيعطيها لاتباعو كيف دار فاستوكهولم واديس ابيبا وتنزانيا. عقلية ذكورية كتحكم فيه الولاء ليه ماشي الخدمة والاستحقاق
دابا وحدة بحال الموتشو. هو رافض حتى الاعلام يهدر عليها. كيمرض بزاف باش صورها كتكون فالصحف. هادي ديبلوماسية شابة وفاقزة. بانت فجنيف ومشات لنيويورك. كان تكون فبلاصة هاد زنبير اللي كيعقل على الحسن الاول. فاتو الوقت وفاتو الزمان وماشي ولد اليوم. غير هو بوريطة عندو رأي اخر وكيبغي يغمق علينا بالارقام