محمد سقراط-كود///
في صفحة موقع كود العجيبة فوقاش ماتحط شي مقال كيهدر على أي حاجة من غير الغلاء كينقزوا وحدين كثار ويكتبوا وا هدروا على الغلاء راه الناس ماتت بالجوع، إلا نتومة رجال هدروا على الغلاء، كأن الغلاء شي سر من أسرار الكون وغير أقلية لي كشفاتوا وخاص يتجند الإعلام كامل باش يقنعوا بيه المغاربة بلي كاين ويوصلوا صوتهم للحكومة أو للملك باش يديلار نهاية ليه، كأن طاقم كود مافيهش المزاليط لي صاليرهم بلا غلاء مكيكملش الشهر أصلا، أما بهاد الغلا راه ولاو غير يتشهاو ويتفرجو في يوتوب بلا مايشريو، أو كأن طاقم موقع كود تجمع للدوماليين كالسين في أوقات فراغهم يستفزوا المغاربة بديك الصفحة العجيبة، راه حتا حنا نأكل مع الناس ونمشي في الأسواق ونشتري الكروفيط في راس الشهر الى تشهينا شي طويجين ريكامونطي، وننتظر ليالي الشتاء الباردة حيث البيصارة والعدس وريمونتادات الريال.
الصراحة في المغرب الخضرا والمعيشة كتغلى حتى تعيا كتبقى رخيصة مقارنة بدول أخرى، الموشكيل الحقيقي لي عندنا هخو الخدمات ديال الدولة، هو فاش كتمرض وكتلقى راسك بزز منك تمشي للقطاع الخاص حيت سبيطار الدولة ممكن تتعفن وماتوصلش نبوتك وحتى الى وصلات راه معندهم والو والقطاع خارية عليه ديال بصح، وعامر بالقتالة والسفاحة والنصابة المتسلسلين، أي عيادة ديال طبيب مشيتي ليها غادي تلقى ناس دراوش مافحالهومش مسلفين ومكلفين باش يدوزو الطبيب وجايين من بلاصة بعيدة وهازين معاهم تحاليل وفحوص بالأشعة داروها في مختبرات خاصة وماغادي يتعوضوا عليها والو حتى داك الكذبة لي كيرد الضمان الإجتماعي ماغاديش يشدوها، وحتى الرميد مكاغادي توصلهم النوبة في الدولة وطريقة التعامل والمتاهة البيروقراطية غادي يكون الواحد تعفن عاد توصلوا النوبة حتى يكون جاه مرض واحد آخر جديد.
أنا مثلا نطير حتى نعيا نستهلك واحد 200 درهم دالخضرة في الشهر تغلى حتى تعيا غادي تزادني واحد العشرين ولا تلاتين درهم، كذلك اللحم والحوت غلى شوية، نطير حتى نعيا ناكل ألف درهم في الشهر في المجموع وهادشي راه مبرع راسي راه فيها حتى طرف ديال الباغموزون وفريمجات بالأنواع وكدا، ماشي الماكلة لي كبرت بيها عند واليديا الدواز والقطاني والسردين وكابايلة والشرن والبخوش دروبيو، ولكن غير كيجيك مرض بسيط كتلقى راسك حطيتي 1500 درهم في أبسط الأحوال، أنا نيت حطيت الشهر لاخر ألف وخمسمية ردو ليا منها ربعمية وشي صريف هاد الشهر حطيت 800 درهم، طبعا غادي يردو فيها شي 200، الى خاص شي نضال حقيقي وشي غوت وروبيج وروينة راه خاص يكون من أجل الخدمات الصحية وجودة الحياة والتعليم راه هوما لي البلاد خارية عليها فيهم ديال بصح، أما الزيت والطحين والسكر راه هادو مطالب مابعد الإستقلال والقرن الفايت خرجوا على ودهم الناس وماتوا، راه الحقيقة لي كتفرع القدرة الشرائية هي شحال كيخلصوا الأباء على ولادهم في المدارس والمصحات وعند الأطباء والدوايات لي مكيرجع ليهم والو.