كود الرباط//
إلگراندي طوطو، هزم كولشي وطيح الروابا كاملين، حقق اعلى حضور للجمهور للسهرة لي دار اليوم السبت ف اولم السويسي، حدا اوطيل سوفيتيل، عشرات الالاف من الشابات والشباب عشاق الفن وللي فان ديالو جاو للسهرة وحيحو، لدرجة الطرقان تسدو بسبب الجمهور الكبير لي جا. الطرقان تسدو من اكدال .
طوطو طلع للمنصة د السويسي، فجو حماسي كبير، كولشي كيتسناه، جمهور عاشق مهبول على اغانيه، كيشطح من البدية، واللي تعطل كيجي يجري با يوصل.
من ديبار طوطو دار مساجات، اولها انه حاكم لازون د الراب والغناء ف المغرب، مغني الجيل الحالي، وثاني مساج هو انه اختار لبسة باش يطلع، تيشور وشورط بتصميم على البوم salgoat لي كان دار اختار ليه هاد السمية بعدما نعتو عبد الاله بنكيران، زعيم البي جي دي بالسلگوط.
النعث بالسلگوط، خداها طوطو فكرة لتسمية العمل الجديد بطريقة مقصودة و اللي ساعات قليلة مور ما لاحو جاب عدد مشاهدات ردا على استفزاز بتميزات، و اللي بغا يوصلو من خلاله انه داك اللي نعتيه بالسلكوط ها علاياش قاد، وأكد هادشي بتغريدة صريحة على موقع X.
تراك ديال salgoat باش حيح طوطو اليوم مكون من 17 أغنية او تراك بلغة الراب. اختيار الاسم مكانش عشوائي فطوطو اختار اسم و اللي فيه كلمة GOAT القصد ديالها *الواعر في مجاله*، حيت الاسم قريب لكلمة سلكوط و هي كلمة نعتو بيها رئيس الحكومة السابق عبد الإله بنكيران، زعيم الإسلام السياسي، حيث اعتبر أن طوطو و الأمثال ديالو سلاكط.
طوطو تضامن مع فلسطين وسكان غزة، بسبب استمرار الاعتداءات الاسرائيلية.. مساج قوي فوق منصة النجوم العالميين لي ف الكثير من الاحيان كيحاولو مايجبدوش هاد القضية.
فهاد السهرة، الصور والفيديوهات كتحكي على كولشي.. الحيحة كبيرة عند الجمهور، وطبعا كان زحام كبير وكانو بنات سخفو وتدافعات خصوصا ف المقدمة.
