سهام البارودي كود//
فاش كاتشوف الفيديوات ديال أعمال الشغب بمناسبة عاشوراء، كاتلقى بلي الأغلبية الساحقة ديال المشاركين هوما قاصرين، قاصرين دالعين فالزناقي مورا الحداش د الليل وحتى واحد مامسوق ليهم.
حسب التجربة الشخصية ديالي، فأوروبا مثلا، مستحيل تلقى الدراري الصغار والقاصرين فالزنقة مورا ماكايطيح الظلام، إلا فحالات قليلة، مثلا شي فيستيفال، شي حفلة، وديما كايكون معاهم شي إنسان راشد، ولكن هاد التكتلات ديال المراهقين فالدروبة بشكل عشوائي راه يمكن تلقاها غا فدوك الأحياء الهامشية لي كايعيشو فيها المهاجرين لي مقودة عليهم أما الأوروبيين مستحيل يخلي ولدو دالع فالزناقي بلا حسيب ولا رقيب.
داكشي علاش أنا كانحمل مسؤولية أعمال الشغب لي طرات فسلا فليلة عاشوراء للواليدين بالدرجة الأولى، كيفاش انت أب ولا نتي أم وطالقين ولادكم فالزنقة فنصاصات الليل؟ مامسوقينش ليهم لا واش خطفهم شي حد لا واش غتاصبهم شي حد لا واش كايتعاطاو لشي مخدر لاواش كايمارسو شي نشاط إجرامي؟ تاشمن أبوة واشمن أمومة واش من جنة تحت أقدام هاد الأمهات واشمن وبـ الوالدين إحسانا؟! فيناهوما أصلا الواليدين فهاد الحالة لي يستاهلو الإحسان؟
فاش كاتقرر أنك تجيب طفل للوجود راه فنفس الوقت البلاد كاتساين منك تجيب ليها مواطن جديد، انت المسؤول الأول على السلامة الجسدية والنفسية ديالو باش يكون مواطن صالح، انت لي خاصك توفر ليه الرعاية النفسية والظروف باش يكبر إنسان زوين، ماشي تولد وطلق علينا زريعتك فالزناقي، كايشفرو الصيكان ويمسحو الجاج فالفوروجات ويسعاو الخبز ويشيرو بالحجر على المخزن !
داكشي علاش أنا شخصيا كانشوف بلي خاص تزاد جريمة جديدة سميتها “تكوين مجرم” فحال “تكوين عصابة إجرامية” وتطبق العقوبة ديالها على الواليدين لي كايكونو أطفال ومراهقين مجرمين، حيت راه عندهم مسؤولية كبيرة فتكوين داك الطفل مايمكنش ولدك يهرس مخزني من كتفو ويسبب ليه إعاقة ودوز ليك طريفة! خاصك تتعاقب حتا انت لي “كونتي لينا مجرم” عوض أنك تكون لينا طفل او مراهق سوي، حيت هاد الشغب والجرائم ماكانوش غايوقعو كون كنتي شاد ولدك حداك كاتفرجو فسهرة دوزيم ولا كاتراجع معاه الدروس ولا معشيه ومنعسو فداك الوقت !
الإهمال الأسري ثابت فهاد الحالة وخاص العقوبة تطبّق مافيهاش التخرشيش.