محمد سقراط-كود///
المدرسة المغربية دايرة بحال الحبس، مكتعلم فيها هواية مكتعلم رياضة ماوالو، وكذلك الحبس في المغرب كتضل مجبد في البياص كتعلم غير الاجرام .. وكذلك الحياة بصفة عامة في المغرب سواء الاحياء الشعبية وحاليا حتى الراقية مكاين متقود فيهم، كإنسان عندك هواية او ميولات فنية او اي حاجة كتجعل منك انسان عصري، الدولة سامحة في بنادم كينبث بحال الخبيزة او بحال ماوكلي وكتبقى تسائل علاش هاد الجيل طلع ممربيش، راه حتى الجيل لي قبل منو مكانش مربي وجيل واليديهم مكانش مربي حتى هو، راه عمرو كان شي جيل مربي ومتحضر في المغرب كاين فقط اجيال لم توثق الهمجية ديالها واجيال تم توثيق سلوكياتها والمغاربة كيتظاهرو بالدهشة بحال الى ماشي هادوك هوما حنا.
راه جيلنا شحال من مرة تضارب بالحجر مع المخزن على والو، كنا غير مكنبغيوش نقراو كنديرو مظاهرة تضامنا مع غزة او العراق هادشي غير في الاعدادي وكيسيفطو لينا السيمي كنوضوها معاهم، الفرق هو فاش كنا كنحصلو كناكلو لعصى ديال بصح من عند البوليس وكيسوقلينا حتى حد الخبار، دابا حقا كاين الحقوق ومابقاتش الحگرة المجانية ديال المخزن، ولكن في المقابل كاين عقوبات حبسية طويلة في حق لي حصل، شحال هادي بنادم كيشبع جرائم بالانواع والاشكال يالله كيجيب خمسنين يدوز فيها كثر من النص ويخرج بالعفو، دابل تبدلات الوقت من هاد الناحية.
راه حرفيا الدولة سامحة في بنادم كينبث بحال الخبيزة وباغاه يكون متمدن ومتحضر وكيحتارم القانون، راه الهدرة لي قالو ولاد سيدي قاسم هي لي كتلخص هادشي، كون كانت دار الشباب نتلاهاو فيها گاع مندوزو للحمارة، راه المراهق او الشاب المغربي معندو الحق في الولوج لتحتى شي مرفق عمومي يمكن يساعدو يفجر طاقتوا أيا كانت، من غير ملاعب القرب وحتى هي راه ماشي غير اجي وزطم فيها، راه أي نشاط او هواية بغا يمارسها خاصو يصرف من جيبو عليها، أول حاجة خاص رياضة مدرسية حقيقية كتبدى من الابتدائي وتكون تنافسية لي تقدر تولي منتجة من بعد، عاد بالاظافة الى أنشطة فنية التصوير المسرح صناعة الفيديو، الرسم، الموسيقى وهادي اهم حاجة، راه دول فقيرة وكتلقى التلاميذ في الابتدائي عندهم دروس ديال الموسقى وعندهم فرقة موسيقية ديال المدرسة وكل واحد كيعرف يعزف على آلة، او مشارك في فرقة مسرحية او أي مجال ابداعي كيف مكان، راه دوك الاحياء الفقيرة ديال الكوحل في ميريكان وبسباب حصص الموسيقى المدرسية كيقدرو يخرجوا عازفين ديال الجاز عالميين من وسط الفقر والاجرام والمخدرات، حنا كتمشي لمدرسة دايرة بحال الحبس في القرون الوسطى مافيها حتى نشاط، من التحضيري حتى للاجازة يالله كتعرف الكتوبة وستيلوات، تقدر تدخل لأحياء شعبية فيها مئات الالاف ديال السكان وماتلقى حتى واحد كيعرف يعزف على آلة موسيقية او عندو شي هواية كما كانت، كيمشي للمدرسة وياكل ويخرى والدولة كتسناه يكون متمدن.