وكالات//
استعمل واحد الشخص صوت مزور بالذكاء الاصطناعي باش يتقمص شخصية وزير الخارجية الأميركي ماركو روبيو، وتّاصل بهاذ الطريقة مع ثلاثة وزراء خارجية وسياسيين فميريكان، حسب برقية من وزارة الخارجية الأميركية شافتها وكالة رويترز نهار الثلاثاء.
وحسب نفس البرقية، فهاد الشخص تواصل مع وزراء ومع حاكم ولاية وعضو فالكونغرس فوسط شهر يونيو، عن طريق تطبيق “سيغنال” ديال المراسلة.
البرقية قالت إنه فحالتين، خلى هاد الشخص رسائل صوتية، وفحالة ثالثة صيفط رسالة مكتوبة كيدعو فيها الضحية يتواصل معاه على “سيغنال”.
وزادت البرقية: “الفاعل غالبًا كان ناوي يستغل الرسائل النصية والصوتية اللي تولدات بالذكاء الاصطناعي باش يخدع الضحايا ويستدرج منهم معلومات أو يوصل لحساباتهم”.
البرقية ديال وزارة الخارجية، اللي مؤرخة فـ3 يوليوز، ترسلات لجميع السفارات والقنصليات، وكتقترح على الموظفين يحذروا الشركاء ديالهم من الحسابات المزورة وانتحال الهويات.
وجابت البرقية مثال ثاني وقع فشهر أبريل، نسبت فيه هجوم إلكتروني لوحد الهاكر اللي عندو علاقة بروسيا، دار حملة تصيد إلكتروني استهدفات مراكز أبحاث، نشطاء، معارضين من أوروبا الشرقية، وحتى مسؤولين قدامى فوزارة الخارجية الأميركية.
الهاكر هذا استعمل إيميل مزور بالنطاق “@state.gov” ( ديال وزارة الخارجية الأميركية) مع الشعارات الرسمية ديال المكتب ديال التكنولوجيا الدبلوماسية، باش يعطي مصداقية كاذبة للرسائل ديالو.