سهام البارودي كود//
واحد التعالي كايهضرو بيه البومرز المغاربة على الجيل الجديد ديال الفنانة وواحد النظرة الاستعلائية مافهمتش منين جابوها؟ مافهمتش شكون قاليهم بلي عندهم الحق فيها؟
فحال مؤخرا النقاش لي طرا مورا السهرة ديال طوطو فموازين، خرجو لينا شي شرّاف كاينظّرو فالفن المغربي.. وكيفاش خاصو يكون الفن المغربي والكلمات لي خاصها تستخدم فالفن المغربي فحال ماجدة اليحياوي ولي ماعرفتش شكون عطاها الضروا باش تحدد لينا المعايير ديال الفن المغربي وشنو خاص يكون وشنو ماخاصش يكون!
بصح، هاد النقاش ديال الذوق الفني كاتلقاه فجميع الدول وفجميع الأجيال، فحال فمصر مثلا فاش بان عبد الحليم حافظ لي حاليا يعتبر أسطورة فالغناء، تعرض فبداياتو لهجوم شرس من الجيل اللي قبله، خصوصاً عشاق أم كلثوم، عبد الوهاب، وفريد الأطرش ولي عتابروه دري صغير وموسيقتو خفيفة وماعندوش صوت! عبد الحليم حافظ كان هوا طوطو ديال الزمان ديالو! ونفس الشيء وقع مع موسيقى الروك مثلا نهار بانت بزاف ديال الناس من الجيل السابق عتابروها موسيقى الشيطان… وهادشي مامنعش أنه عبد الحليم والروك يدخلو لقلوب بزاف ديال الناس ويحققوا نجاحات باهرة.
ولكن لي خاص البومرز المغاربة يتعلموه من التاريخ، هوا أنه كل جيل وذوقه وكل جيل ورموزه وكل جيل والفن لي كايجي معاه، وخاصهم يحتارمو الجيل الجديد ويشلو فمهم بالسمن والعسل قبل مايجبدو طوطو ولا غيره من الفنانين الجداد.
حيت على الأقل على الأقل، هاد الجيل الجديد كايعبر على الفن ديالو بالدارجة المغربية الحقيقية، كايعبر على الغضب وعلى التعاسة وعلى الفرح وعلى النجاح بالدارجة وماشي ديك الدارجة “البيضاء” لي كانو كايستخدموها الفنانين القدام! لا! الدارجة الحقيقية. يعني أنه هاد الجيل الجديد اكثر تصالحا مع الهوية ديالو المغربية من الجيل القديم لي كان “ماراضيش” بيها.
وهادا جيل ناجح، قدر يوصل الدارجة لبزاف ديال البلدان وقدر يحقق داكشي لي الأجيال السابقة فشلو فيه وكيما قلنا! على الأقل صالح الشباب المغاربة مع اللغة ديالهم.
الفن ماشي مطلوب منو يكون “نقي” ولا “مؤدب” الفن مطلوب منو أنه يعبر على الناس وصافي، يفوج عليهم، يفرحهم ويعبر على داكشي باش كايحسو، الغضب، الاستياء، الفرح، القهرة… وهادا فحد ذاتو راه تحدي حقيقي نجح فيه الجيل الجديد وفشل فيه الجيل القديم!
هادشي علاش خاص البومرز يحتارمو الجيل الجديد.