سهام البارودي – كود//
وا شوف التبوهيل كي داير ! بنكيران خرج بواحد التصريح كايقول فيه بلي العيالات خاصهم يتجوجو باش اوموان يلقاو لي يديهم للسبيطار الا مرضو و يدفنهم الا ماتو ! شفتي هاد الهضرة كون سمعتها من فم جدّاتي و لا شي خالتي فالثمانينات و لا التسعينات كنت نقدر نلقى ليها العذر و لكن باش تسمعها من فم زعيم سياسي لواحد من اكبر الاحزاب السياسية فالمغرب و فوقاش ؟ ف2025 راه قمّة التخلف و الشعبوية !
نتا كحزب سياسي خاصك تحشم على عاراضك و تسائل الدولة على الدور ديالها فتوفير الرعاية الصحية و الاجتماعية كبار السّن عوض انك تغطي على الفشل ديال الدولة بفحال هاد الهضرة المعربزة ! خدمت تلقى حلول واقعية و حقيقية للأزمة لي كايعيشوها بزاف ديال كبار السن فالمغرب لي كانوشوفوهم مليوحين فالزناقي و كايسعاو فالفوروجات، حيت فالدول المحترمة المواطنين سواءا عيالات و لا رجال مزوجين و لا مامزوجينش، ماعندهمش هاد الهاجس ديال “الا مرضت شكون يمد ليا كاس د الما” و “الا مت شكون يدفني؟” حيت الدولة موفرة المؤسسات الكافية لي خدمتها انها تقدم الرعاية الطبية و الاجتماعية لكبار السن !
فالدول المحترمة سواءا تزوجتي او ماتزوجتيش، ماغاتلقاش راجل كبير كايضور بجلابة مثقوبة كايسعى حيت ماعندو ماكايكل و مايشرب و لا كايدق عليك فالنهار اللخر ديال رمضان باش تعطيه الفطرة، حيت فالدول المحترمة المواطنين كايخدمو و كايساهمو بالضريبة و كاتكون عندهم الاستقلالية المادية الكافية باش أنهم يعيشو “الشرف” ديالهم بكرامة و انسانية.
جون جاك و كاترين، نهار كايشدو التقاعد كايشريو كارافان و كايبقاو يسافرو و يكتاشفو الصويرة و اكادير و ايمسوان و ياكلو الحوت فالمرسى و نهار كايعياو و الصحة كاتقلال كايمشيو لدور الرعاية الخاصة بالعجزة فين كايلقاو فريق طبي كايتسناهم باش يوفر ليهم التطبيب و الاكل الصحي و المرافقة و الرياضة و حتى الحفلات و السهرات حتى لنهار كايدي مول الامانة أمانتو ! و نهار كايدي مول الأمانة امانتو جون جاك و كاترين كاتلقاهم فاش كانو حيّين خلصو على راسهم جميع مستلزمات الدفن و الاجراءات و حتى الحفلة ديال العزاء ! خلصوها بفلوسهم باش مايشكلوش عبئ على العائلة ديالهم !
هادشي هوا لي كايتسمّى “الكرامة” و لي بنكيران و لي فحالو، خاصهم نورمالمون يفكرو فكيفاش يضمنو الكرامة لكبار السن فالمغرب، عوض انهم ينصحو الناس يتجوجو باش يلقاو لي يدفنهم ! راه هادشي لي خلا بزاف ديال ليكوبل مجوجين فالمغرب و لكن مدفونين بالحياة ! علاه المرا لي كاتجوج غا باش تلقى لي يدفنها مرا ؟ و الراجل لي كايتجوج باش يلقى لي يمد ليه كاس د الما راجل ؟ عشنا الحب بكري و ولدنا الاولاد بكري و كبرناهم و خليناهم مواطنين اسوياء بكري ! طز
الناس كايتجوجو باش يعيشو علاقة سوية زوينة، كل واحد عندو الاستقلالية الكافية نهار كايختار شريك الحياة كايتختارو عن قناعة و اقتناع ماشي باش يلقى لي يدفنو ! وا وجه القبر !
داكشي كان شحال هادي ، دابا الناس بغات تعيش بكرامة فدولة كاتضمن الكرامة و مؤسسات كاتوفر الرعاية لكبار السن، سواءا تزوجتي و لا ماتزوجتيش، راجل و لا مرا.