وكالات//
خلق الإعلان على مشاركة الفنان الجزائري الشاب مامي فمهرجان الحمامات الدولي فـ تونس ضجة كبيرة وجدال واسع، بسبب الإدانة السابقة ديالو فقضية ديال العنف الجنسي والجسدي، وخرجات دعوات كتطالب بمقاطعة السهرة ديالو.
وكان الشاب مامي، اللي عندو 58 عام، تحكم عليه فـ2009 فـ فرنسا بتهم ديال الاحتجاز القسري، والعنف الجسدي، ومحاولة إجهاض قسري بلا رضا الضحية، وتحكم عليه بخمس سنين ديال الحبس، ولكن خرج بشروط فـ2011 بعدما دوز نصف العقوبة.
وبعد مدة طويلة ديال الغياب على الساحة الفنية، أعلن مهرجان الحمامات أن الشاب مامي غادي يدير حفل فـ8 غشت، وهاد الإعلان دار موجة انتقادات فمواقع التواصل، بحيث بزاف من الناس اتهمو إدارة المهرجان بالإهمال وتجاهل ماضي الفنان القضائي.
ورغم الجدل، قالت إدارة المهرجان أن التذاكر ديال حفلة الشاب مامي تسالات كاملة قبل بشهر من الموعد.
من جهتهم، اعتبرات حملة “أنا زادة” فبلاغ رسمي أن دعوة الشاب مامي للمهرجان كتمثل “تطبيع واضح مع العنف الجنسي وثقافة الإفلات من العقاب”، وقالو أن المهرجان كيساهم فتشجيع ثقافة الاغتصاب، حيث عيطو لفنان مدان قضائياً بتهم فيها الاحتجاز والعنف ومحاولة إجهاض ضد مرأة بلا رضاها.
وطالبو فالحملة بسحب الدعوة ديال الشاب مامي فوراً، واعتذار رسمي من إدارة المهرجان، مع التزام بعدم دعوة أي شخص متورط فالعنف الذكوري فالمستقبل، وعاودو ناداو بمقاطعة الحفل.