كود بني ملال//
اهتزت ساكنة “أولاد يوسف” نواحي بني ملال، على وقع حادث خطير ليلة الجمعة السبت لي تحول من اعتصام إلى فاجعة إنسانية بكل المقاييس.
هادشي وقع قبل لفجر بعدما حاولات فرقة خاصة من الدرك الملكي تدخل باش تحيد المعتصم لي كان طالع لأعلى خزان مائي من أكثر من جوج سيمانات، ولكن الأمور خرجات على السيطرة فواحد اللحظة.
وحسب مصادر محلية، فالعناصر ديال الدرك حاولات توقف المعتصم وتشدو باش يساليو هاد الأزمة، ولكن هاد الأخير تراجع اللور، وزلق من فوق الخزان، والمشكل الكبير أنه كان رابط حبل فعنقو، وهادشي خلا جسدو يبقى معلق للحظات.
واحد من عناصر الدرك تدخل بسرعة وقطع الحبل، وطيحو، وتم نقله فحالة جد خطيرة لقسم الإنعاش فالمستشفى الجهوي ببني ملال، ودابا كيرقد بين الحياة والموت.
القضية ما وقفاش هنا، بحيث المعتصم فنهار الجمعة كان محاصر واحد عنصر من الوقاية المدنية فوق نفس الخزان، واعتدى عليه بعصا حديدة وخلاه مضروب فالرأس واليد والفخذ. ولكن حسب رواية جديدة، العنصر ديال الوقاية بان ليه مخرج وحاول يقفز، وسقط فوق مجسم بلاستيكي منفوخ بالهواء، لي كانو داروه كاحتياط، وهادشي خفف السقطة ديالو.
دابا هو فمصحة خاصة ببني ملال، وحالتو مستقرة ولكن عندو كسر فاليّد ورضوض فالجسم.
هاد الحادث خلق صدمة كبيرة فصفوف الساكنة والرأي العام المحلي والوطني، خصوصاً أن المعتصم كان كيطلب بفتح تحقيق فوفاة الأب ديالو، وهادشي عطى البُعد الإنساني للقضية، وخلا الملف يتعقد أكثر.
العيون كلها اليوم كتشوف الوضع الصحي ديال المعتصم، وكتنتظر نتائج التحقيق باش نعرفو شنو وقع بالضبط، وكيفاش تحول اعتصام بسيط إلى دراما مأساوية سالات فوق خزان وتحولت لقضية رأي عام.