سهام البارودي – كود//
نايض بزاف ديال الصداع مؤخرا على المغربيات لي كايتجوجو بالاجانب مورا ماخرجات شي وحدة مزوجة بهندي كاتشكى من السفير المغربي فشي دولة افريقية قاليها “واش تقاضاو المغاربة باش تاخدي هندي؟”
طبعا راه مصيبة لا كان هاد الكلام خارج من فم سفير ! هاد الكلام يقدر يخرج من فمّي انا مثلا، من فم صاحبي جمال أكداش !من فم انسان عادي كايعبّر على رأيوو الشخصي الغير محترم و لي كايخصّو غير هوا، و لكن باش يخرج من ممثل دولة، راه مصيبة، علاش ؟ حيت الدولة كايحكمها القانون و لا شيء غير القانون، فاش كاتكون كاتمثل الدولة كاتشد الآراء الشخصية ديالك و تسد عليها فشي مجر و كاتحتاكم للقانون فالمعاملات ديالك مع الناس ! واش السيدة من حقها تزوج بهندي ؟ اه و لكن … لا لا السؤال بسيط نعاودوه، واش من حقها آه لاّ ؟ آآآه ! صافي اذن سالات الهضرة و من حقها تطلب وثيقة كاتخصها او كاتخص ولدها فسفارة تابعة للمملكة المغربية مادامت مامشاتش طلباتها للسفير فبيتو ديال النعاس.
الأصل فالزواج هوا انه الانسان حر يختار شريك الحياة ديالو، من اي جنسية و اي لون و اي بلاد و ديانة بغا، سوقو هاداك، و من حق المغربيات يتجوجو بشكون مابغاو مايمكنش تحجر ليهم على هاد الحق. ياك ماشافرة ؟ لا ! ماقاتلة ؟ لا ! ايوا دخل سوق راسك.
دابا واش الهندي بلان ؟ واش التركي بلان ؟ واش الزماگري بلان؟ هذا رأي شخصي كانفضل نحتافظ بيه لراسي تحت شعار لي عطا زكو لهلا يفكّو.
لي كايهمني أنا هوا الصداع لي نايض على هاد العيالات لي كايختارو يتزوجو بالأجانب و خصوصا الاجانب لي كايعتابروهم شي مغاربة “أقل شأنا” منهم، حيت لي فهمت انه كون كان ميريكاني و لا سويدي و لا فرانساوي هانية و لكن حيت هندي و لا سينيغالي و لا باكيستاني لا ! هاد الجنسيات لي محلقمة بزاف ديال المغاربة و كايتسائلو علاش المغربية غاتخلي ولد بلادها و تمشي مع هندي ؟ الجواب ساهل، باش تصوڤي ! توسامبلومون، بزاف ديال المغربيات باغين حياة احسن بأقل مجهود، كاتسمع مهندس مصري فدبي و لا مهندس هندي فجاكارتا، كاتقول مالي تانا ندير داري و تكون عندي بارطمة فدبي و لا مومباي مجهزة و مفرشة و راجل كايصرف عليا شكون فحالي ؟
كانظن انه كون قلبنا الصورة و كان الرجل المغربي هوا لي عندو هاد السيكسي مع هاد الجنسيات ماكانش غايكون هاد الصداع كامل! مثلا شي مهندسة هندية عايشة فلندن قتارحات على شي واحد مقودة عليه تديه يعيش معاها واش غايقول لا ؟ و لا مثلا عبد السميع جاتو شي سينيغالية شافة فصونطر دابيل قالت ليه نتا غا جلس واكل شارب كامي حاوي وانا نصرف عليك واش غايصدّرها ؟ طبعا لا ! و حنا شفنا بزاف ديال الدراري المغاربة كاتلقايه جايب شي شيبانية ميريكانية قد مّو غا باش يدير الوراق و يصوڤي !
راه الصداع كامل نايض غا حيت ماكاينش تكافؤ الفرص و المغربيات قدرو يقتاحمو شي اسواق الرجل المغربي مالقاش فيها موطئ قدم او موطئ قضيب.