گود كازا/
تعرضت صحافية من دول إفريقيا جنوب الصحراء ومن بلد صديق للمغرب، للگريساج فكازا وهي اللي جايا خدامة فيها هاد الأيام فكاس إفريقيا للعيالات المقامة فالمغرب.
وحسب مقربين من الصحافية فهي كاتفادا تهضر فالموضوع، حيث عزيز عليها المغرب بزاف وكاتبغيه وفرحانة حيث جات له، فتعرضت للسرقة ملي وصلت لكازا الخميس اللي فات جايا لها من الرباط، ووقع لها حادث السرقة حدا محطة ولاد زيان، ملي كانت باغيا تشد طاكسي صغير باش تمشي لتيران العربي الزاولي تخدم تغطية ماتش بوتسوانا ونيجيريا ضمن المجموعة 2 من كاس إفريقيا للسيدات، وهو ينتف لها واحد البرهوش شفار الصاك من يديها وعلق، وهي تصدمت وطاح لها التيليفون فالأرض، وما قدارتش تجري من ورا الشفار اللي نقز من ورا شي صور وهرب، واخا حاولو شي مواطنين يجريو وراه باش يشدوه ولكن علق ودا الصاك.
وحسب نفس المصادر، فالصحافية طاحت بالبكا ملي تشفر لها الصاك، حيث كانو فيه لفلوس باش جايا للمغرب وباش تصرف طيلة تواجدها فبطولة كاس إفريقيا للعيالات، والصاك فيه حتى وراق الخدمة وبطاقة الصحافة ديال بلادها والبطاقة البنكية (كارط گيشي) وشي حوايج آخرين ديالها، وغير الباسبور اللي بقى عندها حيث كانت دايراه فجيبها.
نفس المصادر، وضحت أن المواطنين اللي كانو حداها ملي تگريسات شجعوها باش ديكلاري بالشفار، ولكن هي ما بغاتش تسبب فشي شوهة لبلاد كاتعتبرها بحال بلادها (المغرب) وبحكم المعزة اللي عندها لها وحبها الكبير لها، بقات كاتدعي للشفار بأنه ما يبقاش يشفر ويقلب الحرفة ويويلي إنسان مزيان، وما بغاش تهضر فهاد الموضوع باش ما تعطيش شي صورة خايبة على المغرب والمغاربة واعتبرت أن الحادث هو حادث استثنائي وصافي واخا بقى فيها الحال بزاف حيث فلوسها مشاو، وراه غير المواطنين اللي حضرو للواقعة هما اللي تكلفو لها بفلوس طرونسبور باش خدات طاكسي لتيران العربي الزاولي، وهذا الجيست عجبها بزاف وزاد أكد لها أن المغاربة زونين مع بعض الاستثناءات بحال الشفار اللي گريساها.
هاد ظاهرة الگريساج اللي الصراحة نقصت مؤخرا، ولكن راه مازال كاينة فشي بلايص وهاد السرقة اللي تعرضت لها الصحافية من إفريقيا جنوب الصحرا، بالدار البيضاء، راه كاتدق جرس الإنذار والحذر، خصوصا وأن المغرب مقبل على تنظيم تظاهرات كبيرة بحال كاس إفريقيا 2025 ومونديال 2030 وبحال هاد الظواهر خاصو يقضي عليهم لمصلحة المواطنين والأجانب بجوج.