وكالات //
في مهرجان القاهرة السينمائي فرض الممثل حسين فهمي رئيس المهرجان على كاع الفنانين لي غادي يحضرو الافتتاح “دريس كود”، وطلب من الجميع باش يتلزمو بيها.
حسين فهمي فرض على الرجال باش يلبسو فيستا كحلة وكرافاطة كحلة، أما لعيالات خلا ليهم حرية اختيار الألوان بشرط أن الفساتين تكون مسدودة وطويلة.
وكاين الفنانين لي التزموا بالتعليمات ديال حسين فهمي واحترمو “دريس كود” وكاين لي ضرب بهاد التعليمات عرض الحائط بحال أحمد الفيشاوي لي جا لابس كوستيم في الغوز.
الممثلة الاستعراضية لبنانية دومينيك حوراني حتى هي ما احترمتش دريس كود ديال حفل الافتتاح ولبسات كسوة في الأحمر نصها عريان.
حسين فهمي كان نوض الروينة بسبب الدريس كود لي أول مرة كيتفرض في مهرجان القاهرة السينمائي، وكاين الفنانين لي قاطعو حفل الافتتاح بحال راميا يوسف.
حسين فهمي كان برر القرار ديالو وقال في تصريح بلهجة المصرية: “إحنا مهرجان دولي درجة أولى، ولما جيت المهرجان لقيت إنه كل واحد يلبس إللي هو عاوزه، عيب، أنا هلبس كويس، والناس تلبس لطيف، والفنانات تلبس كويس، المسألة تطورت أكثر مما أتخيل”.