كود كازا ///
هاد ليام بغات “ميدي 1 تيفي” تفتح نقاش على مهنة الصحافة بعد مصادقة الحكومة على مشروع قانون رقم 26.25 يتعلق بإعادة تنظيم المجلس الوطني للصحافة.
دارت خاص. جابت النقابة فشخص رئيس النقابة الوطنية للصحافة المغربية عبد الكبير اخشيشن. جابت مصطفى كينيت من اتحاد المقاولات الصحفية الصغرى. هادو مارسو الصحافة. موقفهم الرافض لمشروع القانون اللي بدات المناقشة ديالو فمجلس النواب، يحترم. راهم صحافيين وكيعرفو المهنة ومنها وليها. موقف يحترم واخا القناة كانت غير محترمة فهاد البرنامج. ما تسناتش حتى لوزير يقدمو بشكل رسمي وعليها تاخد التنظميات المهنية مواقفها وتقدر تجي تعبر عليها فالبلاطو
لكن المثير هو ان القناة “غير المحترمة” فهاد البرنامج جابت واحد ماشي صحافي واسمو محمد ايت بوسلهام. خدم سنوات مع سفارة الامارات فالرباط وفنفس الوقت كان يخدم طلبة المعهد العالي للصحافة يكتبو مقالات ويلقاوهم موقعين باسمو فصحف اماراتية ويعيطهم شي بركة وصافي. “كود” عندها شهادات على هاد الشي. طبعا هاد الشي عندو تقريبا شي 18 عام.
من بعد خرج من عند الامارات وولى كيقدم راسو رئيس منتدى الاستثمار المغربي الخليجي. بهاد الصفة شارك هادي شي عام مع قناة “البحرين” وهدر. دابا كيهدر باسم فيدرالية كمال لحلو “الفيدرالية المغربية للاعلام”.
خدمتو ف”لينكين” التواصل. عندو وكالة للتواصل. يعني ما عندو علاقة بالصحافة ولا بالمجلس الوطني للصحافة. عندو شي شركة ديال التواصل.
دابا علاش القناة اللي باغية تهدر على ملف مهم للمغرب جايبة واحد ما عندو علاقة بالصحافة. راه ماشي اول مرة. شحال من خطرة جابوه.
الصحافة يهدرو عليها الصحافيون ماشي صحاب شركات التواصل ووو