كود مصطفى الشاذلي ///
هاد ليام فين ما دور تلقى اشهارات فيها الاسود. فيها انتصارات المنتخب. فيها رباحات الدراري. شي كيبارك وشي كياخد كلمات من المدرب الركراكي وشي كيوظف الانتصارات. ماركات عالمية بحال “ماكدونالدز” واخرى مغربية فالقهوة واتاي والدگيگ والمالكة وماركات كثيرة مغربية بلا ما نهدرو على وكالات الاسفار…. هاد الماركات ما عمرها دعمات المنتخب. ما عمرها ساهمات مع الاسود. حتى الاشهارات ما كديرهم مع لفراقي ديال البطولة.
هادو انتهازيين حقيرين باغيين يركبو على نتيجة دارها عمل كثير وفلوس ماشي قليلة كتصرف على البنيات التحتية وعلى المنتخبات وعلى الفراقي اللي محيحة فافريقيا.
هاد السيبة خاصها تسالي اليوم قبل غدا. خاص يكون قانون يحمي الاسود من هاد الانتهازيين. يحمي لفراقي ديالنا بحال الوداد والرجا وبركان والجيش ايلى تألقو قاريا من هاد مصاصي الدماء.
قانون يكون ممنوع على اي شركة توظف اسم المنتخب الا بعد ما تحط نسبة لهاد المنتخب يكون اتفاق قبلي عليها.
دابا فرانسا دات كأس العالم فروسيا ووصلات النهاية فقطر 2022 وما قدر حتى حد يقرب للمنتخب يوظفو فاشهارات داخل هاد الدولة.
نفس الشيء بالنسبة لدول اخرى. خاص اللي كيوظف المنتخب واسمو ونتائجو يخلص ونسبة تمشي للعابة طبعا ايلى كان استغلال لصورتهم او لنتيجهم
باراكا من مصان دم الاسود. باراكا من استغلالهم.