كود الرباط//
كيما سبق وشارت ليه “كود” أثناء إلقاء سيدنا لخطابه بمناسبة افتتاح الدورة الأولى من السنة التشريعية الرابعة من الولاية التشريعية ال 11، وفبهو مجلس المستشارين لي تخصص للصحفيين باش يتبعو الخطاب ديال سيدنا عبر شاشة كبيرة، وقعات فضيحة كبيرة حيث ما قدروش المسؤولين على التواصل فالغرفة الثانية يضمنو للصحفيين حسن الانصات وتتبع الخطاب السامي ديال سيدنا بحيث بقا هاد الخطاب كيتقطع والصورة تختفي كيما كيوضح فيديو نشراتو “كود” فحينه.
“كود” قامت بتحريات خاصة وتوصلات إلى أن شركة خاصة تدعى SILVER هي لي محتاكرة لمارشي ديال التواصل داخل مجلس المستشارين هي لي جهزات القاعة بالشاشة والكراسي وختافاو التقنيين ديالها، وبلي قسم التواصل ديال الغرفة الثانية هو لي بقا كيدبر عملية البث.
الصحفيين ما تمكنوش يتبعو الخطاب ديال سيدنا فوقتو وبجودة عالية وأغلبهم رجعو للهواتف ديالهم باش يتداركو الأمر ويلحقو يكتبو مواد حول مضامين هاد الخطاب الهام ولي تخصص كله لقضية الصحراء المغربية.
دابا كيتطرح السؤال: واش هاد الفضيحة غا تدوز بدون تحقيق ومحاسبة رغم خطورتها وخاصة بعد التوجيهات الصارمة الموجهة للبرلمان والواردة فالخطاب الملكي؟
الرئيس المقبل لمجلس المستشارين خاصو يوضع حد لاستهتار الشركات الخاصة وعلاقات بعض الموظفين مع هاد الشركات.
