كود الرباط//
صباح اليوم الأربعاء 25 شتنبر 2024، علنات وزيرة الانتقال الرقمي وإصلاح الإدارة، غيثة مزور (حزب الأصالة والمعاصرة)، عن الإطلاق الرسمي للإستراتيجية الوطنية “المغرب الرقمي 2030″، بحضور المستشار الملكي، أندري أزولاي، وعدد من الوزراء.
فهاد الحفل للي تنظم ف أوطيل سوفيتيل وطبعا بملايين الدراهم، حضر فيه كولشي إلى الرقمنة، شي حاجة سميتها الديجيتال هي آخر حاجة فالحفل لي محضرش ليه رئيس الحكومة ولا رئيسي البرلمان بسباب تواجهم ف مهمات رسمية.
بالاستقبال صفوف ديال المشاركين والمدعويين باش ياخدو البادج المصايب بالبلاستيك وسطو ورقة صغيرة مكتوبة فيها مشارك او الصحافة، روينة وصافي شي رقمنة مكاينش.
فالاستقبال نيت فرقو اللجنة المنظمة على المشاركين والحاضرين ملفات ورقية بالعربية والفرنسية يا حسرة، ولكن الامازيغية مقصية رغم ان الوزيرة اللي مكلفة بملف تنزيل الطابع الرسمي للامازيغية هي غيثة وزيرة الانتقال الرقمي واصلاح الإدارة.
ندخلو للقاعة للداخل وشوفو الشوهة الكبيرة، دارو جوج الالات ديال الديجيتال كيعطيو لايزر مكتوب فيه المغرب الرقمي باللونين الابيض والاسود، تحطو فبلاصة غير مناسبة، واحد الالة ملقصينها غير بالسكوتش الكحل.
اما لداخل القاعة، وزيرة الانتقال الرقمي دارت كولشي بالفرنسية، الهضرة والملف لي قدمات، وحتى المداخلات، علما أن الفرنسية ماشي كاع لغة الديجيتال، رغم أصغر شابة أو شاب فالمغرب كيعرف ابجديات الديجيتال كولشي بالانجليزية. وزيد عليها اقصاء كلي للأمازيغية خصوصا في الترجمة.
أول امتحان لهاد الوزيرة البامية فشلات فيه، هادي خصها ترحل من الوزارة وتمشي فحالها. شوهة كبيرة لبلاد فيها اطر كبيرة فالديجيتال والنيميرك وحتى فالذكاء الاصطناعي.
الوزيرة مزور مدروة بيها جيش من المستشارين والمتعاونين بلا فايدة، منهم واحد تابع غير كود وكيحاول يمنعها تصور، كاردكور وصافي.
