كود – عثمان الشرقي //
نهار السبت 20 ديسمبر غادي تعرض فقاعة مكونة المسرحية الأمازيغية “إيغود”، اللي غاتعرضها فرقة محترف أكادير للفنون ،المسرحية كتسلط الضوء على قضايا اجتماعية مهمة، بحال تهميش ضحايا الزلزال، وكاتعالجها بلغة كوميديا سوداوية مع لمسة من العبث المسرحي.
“إيغود” كتشد المواضيع ديال الهوية والتاريخ، وكتكشف مظاهر الاستلاب الفكري والصراعات الداخلية اللي كتوقع للإنسان، وفنفس الوقت كتبين المعاناة ديال المتضررين من الزلزال وسط تجاهل المجتمع ليهم، الشخصية ديال “إيغود” كتمثل إنسان ما قبل التاريخ، وهادشي باش تربط الماضي بالحاضر وتفتح المجال للتفكير في مستقبل المجتمع.
طاقم العمل اختار يقدم هاد المواضيع بجرأة، باستعمال أسلوب كوميدي ساخر، اللي كيخلي الجمهور يعيد النظر فـ الواقع ويطرح أسئلة على القيم والمعتقدات ديالو. الممثل حميد اشتوك شدد على أن الاسم “إيغود” جاي من الرغبة باش نرجعو للجذور الإنسانية، وكيبين قدرة اللغة الأمازيغية على التعبير على القضايا الإنسانية والتاريخية بطريقة عميقة وجمالية.
المخرج رشيد لهزمير أكد أن المسرحية هي مساءلة مفتوحة لقضايا الهوية والتاريخ، من خلال إخراج عصري كيمزج بين الإضاءة والديكور والرموز الفلسفية. المسرحية كتستعمل سينوغرافيا وإضاءة حديثة، كتوازن بين السخرية والطرافة والطرح الفلسفي، وهادشي اللي كيخليها تجربة فنية مختلفة ومؤثرة فـ الجمهور.