كود هناء ابو علي ///
السينما المغربية صحتها بيخير. البارح كان نهار تقديم فيلم “كذب ابيض” للمخرجة اسماء المدير فمسابقة “نظرة ما” =ان سيرتان روگان= فمهرجان كان الدولي. كان حدث كبير. ماشي هو الفيلم الوحيد المغربي المشارك فهاد المسابقة. كاين فيلم “كلاب الصيد” لكمال الازرق حتى هو كيتنافس على جوائز هاد القسم اللي هو الثاني من حيث الاهمية بعد المسابقة الرسمية اللي فيها جوائز منها السعفة الذهبية. للتذكير فلجنة تحكيم المسابقة الرسمية فيها مخرجة مغربية وهي مريم التوزاني.
بالاضافة الي هاد المسابقة كاين فيلم فوزي بنسعيدي “الثلث الخالي” اللي غادي يتعرض ف”لاكانزين دي رياليزاتور”= نص شهر المخرجين=. واحدة من المسابقات المهمة فهاد المهرجان العالمي.
المغرب ما محيحش غير فالابداع السينمائي٬ محيح حتى فجلب الاستثمارات الضخمة للمغرب. كانت افلام كبيرة سبق ليها تصورات فالمغرب وعطات صورة واعرة على بلادها. الفيلم اللي كلشي كان يتسناه هو الجزء الخامس من “انديانا دجونس”. هاد الفيلم تصور جزء منو عندنا فالمغرب. كانت شي مشاكل فالتصوير ولكن تصور شوية منو.
كاين فيلم “گلادياتور” فجزء جديد غادي يتصور فالمغرب وكاين حتى فيلم نيكولاس كيدج “سيد الحرب” Lord of war غادي يتصور حتى هو الجزء الثاني فيه فالمغرب.
جاذبية المغرب ما جاتش مجانا. كاينة خدمة ومشروع قانون تنظيم الصناعة السينمائية غادي يزيد يقوي هاد الجاذبية وهاد التنافسية. فهاد المشروع غادي يخفض الرسوم الجمركية على دخول الطاقم الاجنبي اللي باغي يصور فيلمو من 20 بالمائة حاليا الى 30 بالمائة.
كاين اقبال كبير فرواق المغرب فالقرية المخصصة للدول فالمهرجان السينمائي. منتجون وحتى دول بحال هنغاريا وغيرها زارو الرواق وتلاقاو بمسؤولين مغاربة. هنغاريا من الدول المنافسة لبلادنا فتصوير الافلام خاصة الامريكية.
كاينة اليوم دينامية فالسينما المغربية. ماشي غير الابداع حتى النصوص القانونية والتشجيع على الاستثمار.