كود – عثمان الشرقي//
فموسم الانتدابات الشتوية اللي ديما كيجيب المفاجآت، بان واحد الانتقال اللي قلب الموازين ودار العْجب فالساحة الفنية، نعيمة نحيلة اللي معروفة عند جمهورها بلقب ملكة النحلّ، قرّرات تبدل الخلية من عند لحسن الخنيفري وتمشي لخلية بدر أوعبي فخطوة فنية تعتابرات بأنها “أقوى انتقال فالميركاتو الشتوي” ديال هاد العام .
نعيمة لي معروفة بلياقتها البدنية وبسوفلها ورقصها ورشاقتها لي كتخلي الجمهور يبقا حال فمو بفعل العسل لي كيخرج من الشطيح ديالها ولي كتداوي به كل من هو مريض او عيان، كتعتبر حتى هي طبيبة من الطبيبات لي كينتقلو فقوافل فنية باش تسهر على التنفيس والراحة والعلاج للجماهير ديالها .
أما لحسن الخنيفري، اللي كانت بينو وبين نعيمة واحد الكيمياء فنية، فتوديعها ليه خلّى بزاف ديال المتابعين يحسوّ بفراغ فالمشهد، نعيمة اختارت طريقها باش تقلب على خلية اخرى مدام عارفة أن عندها جمهورها الخاص لي كيتبعها فين مامشات .
من جهة أخرى بدر أوعبي غادي يكمل الموسم الفني بـ”أقوى انتداب شتوي”، حيت عندو ورقة رابحة جديدة، حضور نعيمة النحيلة غادي يعطي نفس مختلف للمشروع الفني ديالو، وغادي يزيد يخلّي المنافسة تشعل بين بدر والفرق الأخرى لي كتنافس على الساحة الفنية بحال أومكيل ولخنيفري وأحوزار لي كينشط حتى هو إلى جانب بدر فالساحة الأوروبية خصوصا روما وباريس.