عمـر المزيـن – كود//
شدات اللجنة المؤقتة لتسيير قطاع الصحافة والنشر الطريق على منتحلي صفة صحافي مهني الذين يقدمون أنفسهم “صحافيين” لعدد من المؤسسات، وبعضهم تبث قضائيا أنهم يمارسون أفعال إجرامية باسم المهنة، وفيهم اللي تحكم بالحبس على هادشي.
مصدر من داخل اللجنة أكد لـ”كود” أن العهد السابق انتهى، موضحا أن اللي صحافي مهني وعندو الأمور ديالو قانونية غادي يحصل على البطاقة المهنية لسنة 2024، واللي عندو شي خدمة أخرى وبغا يلصق فمهنة الصحافة راه غير كيضيع الوقت ديالو.
ودعا المصدر نفسه، الناس اللي باغية تدير الصحافة باش تمشي تقرا وتدير التكوين فهاد المجال وداك الساعة تجي مكاينش مانع، قبل أن يضيف باللي اللجنة المؤقتة مغاديش تتعرض لأي ضغط من شي جهة كيفما كانت باش تدير شي حاجة خارج القانون.
وعبر عدد من الصحافيين المهنيين عن ارتياحهم على هاد الإجراءات المشددة اللي دارتها اللجنة المؤقتة لتسيير قطاع الصحافة والنشر برئاسة يونس مجاهد، إذ قطعت الطريق على “النجارة” اللي مع الأسف شوهو هاد المهنة ودمروها.