كود علي الصافي //
طوطو نجح يولي اشهر راپور مغربي اليوم. تصورو حتى اصدار “دون بيگ” لالبوم ديالو مع رضى الطالياني٬ ما ثارش النقاش اللي كان خاصو يثيرو. السبب ان طوطو ومن سهرة الرباط وبعدها سهرة البولڤار فكازا٬ شغل كلشي.
الموضوع ولى مجتمعي ماشي حكر على الرواپة. شفنا شي سياسيين غالبيتهم اسلاميون ولاو كينظرو فالمجتمع. كيديرو استنتاجات بناء علي ايديولوجيتهم وكيوهمو القارئ بحال ايلى هاد الشي بحث اجتماعي او بحث فهاد الظاهرة.
هاد النقاش كيدكرنا فنقاش سابق داروه اساتذة هاد المتطرفين المحافظين هادي سنوات. عقلتو نهار خرج بلال التليدي كان فالتجديد ديك الساعة ومعاه عبد الكريم برشيد المسرحي ف”دوزيم” عند جامع كولحسن فدوزيم؟ قال باللي هاد الهيب هوب ماشي ديالنا وباللي هادا “تهريب ثقافي” بضاعة خارج القانون كتدخل للمغرب ومضرة للصحة. اييه قالها وكانت اغنية ل”هوبا هوبا سبيريت” خلدات هاد الشي بعنوان “الكلاخ”.
طلبة هادو اللي كانو خدامين فالتجديد وكانو فالتجديد الطلابي وهمو كثير من لمغاربة باللي قطعو مع هاد الثقافة. كانو كيديرو التقية. شفتاهم مع حادثة “طوطو” كيهاجموه. بدلو المعجم. ما قالوش راه تهريب ثقافي. ولاو كيقولو راه خاصو الاعتقال ويتشد. تبدل الاسلوب ولكن النتيجة هي هي. مصادرة حق الرواپة.
هادو روجو لواحد النوع من الراب كيمثلو مسلم وفناير. راب محافظ كيشبههم. كيقدمو معطيات خاطئة على هاد الفن. على ولادتو. على تطورو فالمغرب خلال هاد 30 سنة اللي فاتت. بغاو بحال كيف دار استاذهم نجيب بوليف “الفن النظيف”. جابو هاد المصطلحات من عند الاخوان المصريين. هادو كلشي جايبينو من الشرق المتخلف وكيتاهمو الراب باللي فن دخيل.
المحافظون من اسلاميين متطرفين واخرين يدعون الوسطية وفعمقهم متطرف٬ ضد كل شكل جديد. رفضهم للراب ماشي حقاش فن خضر ما عندوش مع الزواق وخارج من “الاحياء الخلفية” للمدن المغربية٬ بل لانو فن كيعري امراض المجتمع ماشي كيغطيها. كيفضح ماشي كيستر. كتعرفو علاقة الاسلاميين بالسترة. كلشي كيبيغيوه يديروه فالظلام. هادا حال طيور الظلام حتى يتحكمو فالمجتمع. عارفين باللي الراب غادي يفضحهم. على هاد الشي ضدو. الراب فضحهم. واخا لبسو لگرافاطات وتخلطو معانا بان تطرفهم فهاد القضية.
الجانب الايجابي فهاد النقاش هو فرشة هاد العينة. اللي عاش سنوات وتربى مع الاسلاميين ما يمكنش يتغير ايلي ما دارش مراجعة فكرية. لبسة او كاس او قحبة ما يمكنش تغيرو.