كود الرباط//
فرق كبير بين مهرجان موازين، والمهرجان للي كادير وزارة الثقافة فبورگراگ، الأول كيعرف نجاح كبير ومأمن بزاف ومنظم، والثاني غير الفوضى و”باك صاحبي” لي مولفين بيها شي رباطيين.
وحسب ما عاينته “گود” فالمهرجان فقد الهيت ديالو، كانو فيه اعتقالات أما الاسباب كتعلق بتناول الحشيش و المشروبات الكحولية، إضافة إلى أن الجمهور كيخوي بحالو بكري كيخلي المساحة المقابلة للمنصة فارغة.
هاد المهرجان ديال بورگراگ عرف تنظيم سيء بزاف، من الأحسن يتلغى ويعطيو هاد الفلوس فشي مهرجان شعبي كيستحق فمناطق أخرى بالمغرب، حيث هاد الوزارة كتعرف غير رباط رباط فكولشي فالعروض الموسيقية والثقافة والمعارض والفنون التشكيلية و..و.
أسوأ نقطة لوزارة الثقافة والتواصل فهاد المهرجان العجيب، هي التعامل مع الصحافة، كيمنعو الصحافيين يصورو وفي نفس الوقت دايرين اختراع جديد هو ان التصريحات كياخدوها فقط جوج منابر واحد مغربي طبعا تابع للدولة ومن فلوس ضرائب المغاربة، والمنبر الثاني خاص.
حسب مسؤول بوزارة بنسعيد فإن التصريحات كياخدوها فقط هسبريس وSnrt. اختراع جديد للعلاقة مع الإعلام عند هاد المسؤول فوزارة الثقافة.
يشار أن وزارة الشباب والثقافة والتواصل كتنظم مهرجان Rab’Africa و4 إلى 13 غشت 2023، بساحة Bouregrag بالرباط.
