وكالات//
كاتواجه النجمة العالمية تايلور سويفت موجة ديال الجدل من بعد ما علنات على الألبوم الجديد ديالها “The Life of a Showgirl” اللي غادي يخرج نهار 3 أكتوبر 2025، حيث بزاف ديال المتابعين والمعلقين فـ الإنترنت اتهموها بـ”السرقة الفنية” حيت الألبوم عندو شبه كبير مع الأعمال القديمة ديال بريتني سبيرز وكايلي مينوغ.
هاد الألبوم كيبيّن تحوّل كبير فالمسيرة ديال سويفت، بحيث غاديا من الأغاني اللي عندها طابع شخصي وعاطفي لأسلوب بوب استعراضي كيقرّب بزاف لطريقة ديال نجمات بداية الألفينات.
الصور الترويجية، والغلاف الرسمي، وحتى مقاطع من الكليب، دارو ضجة كبيرة، بحيث بزاف ديال المعجبين شافو فيهم تشابه بصري وفني مع لقطات مشهورة ديال سبيرز ومينوغ.
رغم أن بعض الناس شافو أن الألبوم هو بمثابة تكريم لتاريخ البوب النسائي، كاين آخرين اللي وصفوه بأنه “نسخ مبالغ فيه” وما فيهش إبداع.
من الجهة الأخرى، كايلي مينوغ جاوبات على الجدل بطريقة إيجابية وقالت أن هاد التشابه هو “نوع من الإطراء”، ودعات الفنانين الشباب باش يستلهمو من بعضياتهم ولكن يبقاو محافظين على الهوية ديالهم الخاصة.
أما تايلور سويفت، فما جاوباتش مباشرة على الاتهامات، ولكن فتصريحات سابقة قالت أن هاد الألبوم هو “تجربة فنية جديدة” بغاات من خلالها تدمج بين الاستعراض المسرحي والقوة الغنائية والكتابية اللي كتميزها.