وكالات //
مزال الممثل الفرانساوي جيرار ديبارديو منوض الروينة ففرانسا، والقضية دابا وصلات حتى للرئيس إمانويل ماكرون والناطق الرسمي باسم الحكومة أوليفيي فيران.
وسلطات الصحافة الفرانساوية الضو مؤخرا على تصريحات متناقضة على ديبارديو بين الرئيس والمتحدث باسم الحكومة وحتى الوزيرة دالثقافة ف البلاد،
فالوقت لي وصف فيه ماكرون الممثل الفرانساوي بأنه ممثل عظيم ونتاقد حتى الحملة الجماعية الشرسة ضدو.
خرج البارح المتحدث باسم الحكومة بتصريح مختالف تماما وقال انه كيدين التصريحات لي قالها فحق البنات، ولي عتابرها غير لائقة، وقال ان القضاء دابا خاصو يدير خدمتو.
من جيهتها، كشفات وزيرة الثقافة ريما عبد المالك ان الوزارة بدات كتدرس تحيد ليه الوسام لي كانت عطاتو الدولة.
غير باش نفكروكوم، ديبارديو متابع فعدد بتهم ديال التحرش والاعتداء الجنسي، وولا هو الحديث ديال الفرانساويين مؤخرا بعد ماخرجو فيديوهات بان فيها كيهضر على العيالات بطريقة خايبة وخاصة لقطة فين هضر على بنيتة عندها عشر سنين كانت فوق العود فكوريا الشمالية.