عمـر المزيـن – كود//
[email protected]
المنشط الإذاعي بهيت راديو محمد صوفيحة المعروف بـ”مومو” كولشي كيضحك عليه على مواقع التواصل الاجتماعي بسبب النيفو اللي طاح ليه من خلال التهجم اللي دارو فحق نجم القناة الثانية رشيد العلالي.
“مومو” كان بان فشي فيديو في حسابه الخاصة على مواقع التواصل الاجتماعي “أنستغرام”، وانتقد فيه بعض البرامج المعروضة على قنوات القطب العمومي، ولمح فهاد الخرجة الحامضة ديالو لبرنامج “رشيد شو”.
رشيد العلالي رد على “مومو” بطريقة فنية وذكية، ونشر فيديو في صفحته الرسمية بموقع التواصل الاجتماعي “انستغرام”، كيوثق من خلاله لحظة استضافته لمومو عام 2014 مني عبر عن حلمه باش يكون عندو برنامج تلفزيوني.
“كود” هضرات مع رشيد العلالي وعلق على هادشي بالقول: “هاد السيد خرج بجوج فيدويهات وأنا لحدود الآن مزال مخرجت بحتى شي فيديو لكن أنا مغاديش نقدر نجاوب بالطريقة ديالو باش منرجعش بحال مي نعيمة.
وأضاف رشيد شو موجها كلامه إلى “مومو”: “المستوى اللي جاوب بيه راه الناس جاوبوه في التعاليق وسمع على وذنيه لهضرة حقاش هضر بطريقة فيها قلة الاحترام للمهنة وللأصدقاء ديالو، وأنا مدرت والو حطيت غير الفيديو ديالو كيقول فيه أنه حقق الحلم ديالو وهو كالس معايا، وباللي الكلسة فرشيد شو بالنسبة ليه كانت حلم ومزيان الإنسان يحلم وبغا يبان ف التلفزة والإنسان مزال يقدر يحلم وخا ميحققش الحلم ديالو لكن مخاصوش يفقد الأمل”.