وكالات//
دار اليوتيوبر الأمريكي “كودي كرون”، اللي عندو 56 عام، البوز بعد ما نقص من الوزن ديالو 11 كيلو فمدة 46 يوم فقط، وكلشي بفضل خطة صمّمها ليه الذكاء الاصطناعي “شات جي بي تي”، بلا ما يساعدو لا مدرب رياضي لا مختص فالتغذية لا حتى شي دوا.
كودي، اللي هو أب ديال جوج وليدات وعايش فشمال غرب أمريكا، قرر يدخل فهاد التحدي بعدما ولى محبط من الحالة البدنية ديالو، حيث كان كيحس أن الشكل ديالو كيأثر عليه نفسياً وثقتو فراسو نقصات. ومن تما، مشى لـ”شات جي بي تي” وطلب منو يدير ليه واحد البرنامج اللي يوافق السن ديالو وطريقة عيشو، وفعلاً عطاه خطة فيها نظام غذائي صارم، وجدول ديال الرياضة، وحتى نصائح على النوم والعادات اليومية.
بفضل هاد الخطة، الوزن ديالو هبط من 95 كيلو لـ83، وكان كيدير التمارين فالمرآب ديال دارو، اللي حولها لصالة رياضية بسيطة. وكان كيبدا الرياضة مع الرابعة ونص ديال الصباح، يومياً تقريباً، والمدة ديال التمرين كتكون ما بين ساعة وساعة ونص، ستة أيام فالسيمانة.
فالغذاء، امتنع على جميع المأكولات المصنّعة، وكان كياكل غير الماكلة الطبيعية: بحال اللحم، الشوفان، أرز الياسمين، زيت الزيتون، الخضرا الورقية… وتجنب السكر، الزيوت النباتية، ومنتوجات الحليب. وحتى المواد اللي كان كيستعمل كانت عضوية وخالية من الهرمونات.