كود الرباط//
واحد الموقع سميتو الاخبار 24 كتسيرو واحد النكرة عايشا ف فرنسا، اييه، مهمة ديالو بسيطة ف نقل الاخبار، اولا بالنقيل يعني اي صحفي دار مجهود وجاب خبار ونشرها ف جريدة الكترونية كيخدم معها، غادي تلقا نفس الخبر تنشر ف هاد الموقع النكرة.
“گود” حصلت هاد السيت الالكتروني، للي خدامين فيه صحافيين اشباح، علاش، حيث اولا مديرة النشر مكاينش فالمغرب، راها ف فرنسا عايشا، وشنو المهمة للي كادير، زعما مطورة كتخدم الاخبار عن طريق الذكاء الاصطناعي، كتهز لخبار من اي موقع وكتبدلو بالذكاء الاصطناعي (للي هي هو غير داتا كيقاد وينظم وماشي مصدر للخبر) وهنا كيتفرشو بمصطلحات خاصة كنكتبوها فالمقال الاصلي وكنلقاوها عند هاد سيت.
مهم كاينا انباء كتقول بلي هاد الموقع موراه شي حد عندو الكالة ف التواصل والعلاقات العامة وحتى فالمخزن، وهادي جديدة.. اييه صافي لي عندو كالة يدير ما بغا. هاد الفيلم خصو يسالي.
ماشي المرة الاولى فاش حصلناهم نقلو منا، لدرجة ان مديرة النشر اعتذرت وقالي حنا عاد بدينا.. مهم دازت اشهر كثيرة وباقيا حليمة على عادتها.. معرفتش واش هاد عاد بدينا مزال مسالاتش.
لا يعقل الصحفي يدير مجهود ويحرق راسو ويدابز مع المسؤولين باش يكتب خبر او سكوب، وتجي تافهة تنقل الخبار بلاد ذكر المصدر.
والعجب ان هاد السيت موراه شي شركة rp وتواصل، كيخدمو غير مع وزارة الاسرة والتضامن، الوزارة لي فاشلة وغابرا ومبانش عندها حتى دور شوفو غير ف نقاش مدونة الاسرة.. الوزارة غائبة.