وكالات//
كتستعد بريطانيا انها تصدر قوانين جديدة غادي تمنع نهائيا على الدراري الصغار والمراهقين انهم يتسعملو مواقع التواصل الاجتماعي بكاع الأنواع ديالها.
وعلى حساب ما قالت بزاف ديال التقارير صحفية بريطانية، فهاد القرار جا بسبب المشاكل النفسية والصحية والاجتماعية الكبيرة لي كيديروها السوشيال ميديا على الدراري الصغار والمراهقين.
الجورنال ديال تايمز البريطاني لي طالع على هاد مشروع القانون، قال ان المنع غادي يكون على الدراري قل من 16 عام.
كيجي هادشي في الوقت لي تحركات فيه بزاف ديال الدول، بحال أستراليا مثلا باش تدير نفس الإجراءات.
وكيجي كذلك، بعدما خرجات بزاف ديال التقارير العلمية لي كتقول ان السوشيال ميديا كيديرو مشاكل نفسية وعقلية خايبة بزاف للدراري الصغار والمراهقين تقدر توصل حتى للانتحار.