وكالات//
كتختابر شركة واتساب دابا واحد الميزة جديدة تقدر تزيدها فلابليكاسيون، غادي تخليك تحط غير سميتك بلاصت من الرقم ديالك، فالفيرسيون “ويب” لي كتحلها على البي سي ديالك.
ومن شهر ماي لي فات، والشركة كتجرب هاد اللعيبة الجديدة فالتيليفونات، لي غادي تخلي الناس يدخلو غير باسم المستخدم بلاصت النمرة، لأي كونط حليتيه ف الواتساب.
هاد القضية داروها للناس لي بغاو يحافظو على الخصوصية ديالهم، ومابغاوش يشاركو نماريهم مع الناس لخرين، خاصة لي كيدخلو لي كروب.
كتقول التقارير أن هاد الميزة غادي تكون اختيارية، يعني تقدر تبين سميتك كيفما يمكن ليك تبين النمرة ديالك، وتبدلهم ف أي وقت بغيتي.