وكالات//
فواحد التصريح جديد، كشف نجم هوليوود هاريسون فورد، اللي عندو دابا 83 عام، على السبب الحقيقي علاش ما باغيش يعتازل التمثيل، وقال إن هاد المهنة كتحتاج ديما الناس الكبار باش يلعبو الأدوار اللي على قد سنهم.
فورد، اللي معروف بأدواره فـ”ستار وورز” و”إنديانا جونز”، كال “التمثيل كيجذبني حيت كيخلّي الكبار يلقاو بلاصتهم فيه”. وهاد الكلام لي صرح به فورد جا من بعد شهور على انسحابو من حفل الأوسكار بسبب مشكل صحي.
وفـ إنجاز جديد فالمسيرة ديالو، ترشّح هاريسون لأول مرة لجائزة “إيمي”، على الدور ديالو فمسلسل “Shrinking” اللي كيتعرض على منصة “AppleTV+”، فاش كيقدم شخصية الدكتور بول رودس، وهو معالج نفسي مصاب بمرض باركنسون.
وفـ مقابلة مع مجلة “Variety”، كال فورد “ما كنشوفش الإبداع بحال شي منافسة. إلى عجبك العمل مرحبا، إلى ما عجبكش، قلب على شي حاجة أخرى. أنا كنمثّل حيت كيعجبني نحكي القصص ونتقمص شخصيات مختلفة.”
وزاد بأنه تشاور مع زميلو مايكل جيه فوكس، اللي حتى هو مريض بالباركنسون، باش يقدر يجسد الدور بدقة واحترام.
وأضاف “الشجاعة ديال مايكل، والصبر ديالو، واللطف ديالو، كانو مصدر إلهام كبير ليا. وكان ضروري نتعامل مع المرض بجدية وما نخليهش يتحوّل لمجرد نكتة”.
وما نساش فورد يذكر الحوادث اللي عاشها، من بينها تحطم الطيارة ديالو فوق ملعب گولف فـ2015. وكال، فهاد السياق، أن هاد التجارب أثرت فالأداء ديالو كممثل، ولكن ما أثرتش على الحياة اليومية ديالو من بعد ما تعافى.