محمد سقراط-كود///
الحكومة بغات تشري السلم الاجتماعي وتنقص من الغلا ونقصات الضريبة على استيراد اللحوم والزيت وفي المقابل باش تعوض هادشي زادتها على الشراب، حيت السكايرية مساكن حيط قصير ومكاينش لي يدافع عليهم كسكايري، أقول لن نقبل بسلم اجتماعي على ظهر أمننا الروحي فليس باللحم والزيت وحدهم يحيى الإنسان بل خاصو يدوزهم بالروج والكونياك والفودكا والبيرة، أي دولة كتعامل الطاسة وشاربيها بهاد الاحتقار عمرها تزيد لقدام وحتى إلى زادت غادي يكون خرابها حتمي، حيت مايمكنش يبقى بنادم غير يخدم يخدم كي الحمار بلا مايستمتع حتى ببيرة بثمن مناسب يليق بالقدرة الشرائية للمواطن، راه الشراب رمز للازدهار والتقدم راه أزهى عصر إسلامي من ناحية القوة والثراء والإنتاج الفكري والمعرفي هو العصر العباسي وراه كان عصر الطاسة والعربدة والمجون بامتياز، حتى الدولة الإسلامية حتاجت الشراب باش تزداهر مابقى غير المغرب لي باغي يزداهر بمعامل الكابلاج والسميك يالله يوكلك الحرشة والمسمن والكيكة بلا بيض.
عمر شي سكايري دار عمل إرهابي في المغرب أو تزعم شي حراك أو ثورة أو دار شي انتفاضة، أو تفاخر بولائه لدولة أخرى، على عكس صحاب خودنجال جسدهم هنا وعقلهم في الشرق وغير يبان شي لحية واخا يكون من إيران يدينوليه بالولاء، ومع ذلك الدولة دايرة ليهم خاطرهم وكاع مكتزيد الضريبة على داكشي لي كيستهلكوا، فقط مقابلين السكايرية جميع أنواع الحكومات يمين يسار إسلامية حداثية منتخبين تكنوقراط، فين مايقلبوا على الفلوس أرى هادوك لي كيشربو مليون قرعة في العام زيد عليهم شي بركة ديال الضريبة راه معندهمش موشكيل ومكيقدوش يهدرو حيت الشراب في القانون ماخاصوش يتباع ليهم أصلا.
وا الحكومة راعيو شوية وشوفوا شوية لديك الجيه، راه لايعقل بلاد بلا متنفسات معندك مادير فيها من غير الفقصة والكعية، تبغي غير تمشي لشي خلا تلقاه عامر زبل وفين موقفتي خاصك تخلص، تبغي غير تصنت لعظامك يقهروك الطلابة والساعاية بالأنواع، وها لي باغي يركبك فوق العود ها لي باغي يصورك مع القرد، لا سينمات بحال الناس لا أنشطة ثقافية طول العام، بلاد شبابها باقين كل نهار كيحاولو يهربو منها، غير ملائمة للفرح والعيش الحر في المجتمع الحديث، وتجيو للنافذة الوحيدة منين كيقدر الواحد يتنفس وهوما دوك خمسة دالبيرات وباغين تردوا ثمنهم يقدرو عليه غير المسؤولين والوزراء وصحاب الصاليرات الطالعة، البيرة راه بحال الحليب والخبز والما خاصها تكون في متناول أي مواطن ماشي خاصة بفئة وحدة، الله يهديكم على المغاربة السكايرية نهار يسحاو تقدر تكون نوضتهم واعرة.
