سعيد الشاوي كود كازا ///
مندوب المعرض الدولي للفرس سميتو لحبيب مرزاق خارج فرحان كيقول بللي الدورة ال 15 لهاد الحدث اللي دار بمركز المعارض محمد السادس بالجديدة جابت حوالي 200 ألف زائر من مختلف الفئات العمرية.
وزاد فتصريح فصحافي بحال ايلى حقق شي انجاز كبير ان الدورة الاخيرة اللي تنظمات مابين فاتح وسادس أكتوبر الجاري ، عرفات مشاركة أكثر من 40 دولة و أزيد من 700 فارسة وفارس وحوالي ألف فرس من سلالات مختلفة.
خرج بوحدو وهو مول العرس كيقول باللي الدورة ناجحة.
اجي اجي شكون قال ليك ناجحة؟ انت طولتي بزاف فهاد المنصب بلا ما تقدر تجدد هاد الحدث لكبير. فشلتي طورو. فشلتي تبدع فيه.
يا السي المندوب راك كيتنظم بين مدينة فيها 5 مليون ونص وحداك مدن واقاليم بحال الجديدة٬ فيها عدد كبير من السكان. 200 الف زائر راه فشل كبير بزاف. غير تلاميد المدارس بهاد الجهة ايلي جاو غاديين يفوتو هاد العدد.
نشاط بهاد لحجم بموضوع عندو مكانة خاصة عند لمغاربة كان يجيب على الاقل نص مليون. حتى مليون راه ممكنة.
انت ختاريتي دير معرض دولي ما موجهش لكافة لمغاربة. هادا خاصو يلعب دور بيداگوجي ويجيب بزافت التلاميذ من كل المستويات.
هدفك الاول يبقاو يهدرو عليك ويكبرو بيك. كدير غير باش تبان. جايب وكالة هدفها تلميع صورتك ماشي تمليع صورة الفرس. العود. الفروسية راها متأصلة فالمغربي وفشلتي تبين هاد الشي فهاد النشاط اللي عمرو 15 عام. احسن حاجة ديرها تمشي ترتاح وتخلي عقل مبدع مبتكر يدير هاد الخدمة اللي فشلتي فيها
