هناء ابو علي – كود ////
كاين هجوم حقير غبي داعشي مغلف بقلة الذوق ووو على دنيا باطما بسباب لباسها فلندن.
باطما بنت السعادة فالحي المحمدي فكازا بعد ما قصات العقوبة الحبسية ديالها بسباب علاقتها بملف حمزة مون بيبي، خرجات ورجعات للفن.
هاد ليام مشات للندن. لبسات حوايج تعتاقد باللي كيناسبوها. مزيرين او ملونين او واسعين او ديال الموضة، هادا ماشي سوقنا. بنت مغربية ختارت تلبس اللي بغات. جسدها ملكها ماشي ملك لمغاربة. كل واحد عندو جسد يلبس اللي يعتاقد جا معاه او مع قناعاتو.
بلباسها كتعرض باطما لهجوم خايب. كيهدرو على جسدها بواحد النوع من الوضاعة كتكشف المشاكل لكبيرة اللي كيعانيوها.
تكون ضد الرعونة اللي تعاملات بها مع المصور الصحافي ديال “اش نيوز”، هادي عادية. واخا المشكلة ماشي غير فباطما، فالصحافة اللي حضرات فالعرض الاول للفيلم، لو قررات تقاطع النشاط كموقف من تصرفها كلشي غادي يتبدل. ما وقعش هاد الشي، يعني الصحافة فيها مشكلة. النقابة حتى هي ديال الصحافة سكتات على تصرف متهور ديالها.
لكن هادا موضوع ولباسها وحياتها موضوع آخر. من حق باطما، كنهدرو ككود مدافع عن الحريات الفردية، تلبس كيف كتشوف هي.
ما عند حتى واحد الحق يصادر حقها. كاين اتجاه فبلادنا لمصرنة النقاش. باغيين يديرو لينا بحال مصر. باغيين النموذج المتخلف لهاد لبلاد عوض الاقتداء بنموذجها ايام كانت مصر منارة للدفاع عن الفن والحرية.
جسد باطما ملكها. جسد باطما ديالها دير بيه اللي بغات
