كود هناء ابو علي ///
كان من المتوقع يعرفو لمغاربة رسميا الوزراء الجداد فحكومة عزيز اخنوش 2 لكن تأجل الاستقبال الملكي لهاد الوزرا ويقدر يكون غدا يقدر يكون بعدو. “كود” نشرات اسماء وزراء ووزيرات عندهم نسبة كبيرة يغادرو: ميراوي ديال التعليم العالي والصديقي ديال الفلاحة وغيثة مزور ديال الانتقال الرقمي وبن عبد الجليل ديال النقل والجزولي الوزير المنتدب لدى رئيس الحكومة مكلف بالاستثمار والانتقائية وتقييم السياسات العمومية وحيار ديال التضامن. طبعا فيهم بنموسى ديال التعليم لانو عينو سيدنا فبلاصة لحليمي احمد مندوب سامي للتخطيط
لكن ف”كود” وبعيد على اش غادي يجيب هاد التعديل٬ كيبان لينا هاد الوزرا خاصهم يمشيو فحالهم:
وزير الداخلية ماشي غير بسباب فضيحة صورة العار ديال لفنيدق ولكن بسباب حتى التعيينات ديالو الاخيرة اللي فضل فيها تصفية المصالح الشخصية على مصالح لبلاد بحال تعيين جلال بنحيون المدير الجهوي للاستثمار فطنجة اللي ولى عامل علي اقليم النواصر. تصورو طنجاوا دارو احتفال باش مشى فحالو لانو كان موقف الاستثمار. تجيب هادا اللي ما عائلة لفتيت لكازا غادي يبلوكي الوالي لمهيدية اللي ما كيبغيهش الوزير لفتيت. شوفو اش دار لكازا وكيفاش حركها وشوفو حميدوش ديال لفتيت كيفاش كان موقفها. غاديين نرجعو فموضوع بتفصيل لهاد الشي.
اذن لفتيت طول فالداخلية وتجدر وكانت مناسبة يمشي قبل ما تسالي ولاية هاد الحكومة ف2026
كاين بوريطة وزير الخارجية والتعاون. طول ودخل ثقافة خايبة لهاد الوزارة. السفراء عندو اما معاه كيكونو بحال الشاوش عندو او خارجين من يدو وهادو كيدير ليهم العراقيل. وزير باغي يكون وزير وكاتب عام ومكلف بالتواصل. همو ديما صورتو. واعر بزاف بالاستيلاء على خدمة اجهزة اخرى ونسبها لراسو بحال قضية القنصليات فمدن الصحرا. مناسبة يمشي فحالو ويجيبو كاليبر قد هاد الوزارة
ايت الطالب وزير الصحة يستحق يمشي فحالو. قبل ما يمشي خاص انشاء لجنة تقصي الحقائق فمجلس النواب على الصفقات اللي دازت ايام كورونا. كيفاش دازت. شكون خداها. ويكملو بحثهم حتى بعد كورونا ويشوفو شكون كياخد صفقات هاد الوزارة ماشي غير فالادوية والدراسات بل حتى التواصل.
بنعلي ليلى ديال الطاقة كانت تمشي بعد البوسة الشهيرة مع لملايري الاسترالي. ماشي على البوسة. من حقها دير للي بغات. بسباب تضارب المصالح. هادا مستثمر فالهيدروجين وهي حضرات اجتماعات فيها سيدنا على هاد القطاع. واخا مكلف بيه الجزولي ماشي هي ولكن عارفة كلشي. سبب كافي باش تمشي فحالها.
بايطاس. الناطق الرسمي باسم الحكومة المكلف بالعلاقات مع البرلمان لبس لبسة كبيرة عليه. ضعيف سياسيا. ضعيف فالتواصل. غبي فالاجوبة. متخلف فالتفاعل مع الاعلام. فضيحة بكل المقاييس. صعيب عليه يكون وزير
مزور رياض وزير الصناعة والتجارة. هادا وزير قدر يمسح بالجانب السلبي حصيلة مولاي حفيظ العلمي. ضعيف فكلشي. وزير همو الاول يقبل علي تمويل لطونوبيلات عيشورا اللي قدموها لسيدنا. معاه رجعات الميكا. غير على هادو خاصو يغبر وجهو من الحكومة
بنت الباشا المنصوري وزيرة التعمير وسياسة المدينة فشلات فهاد الاوراش اللي عندها. تصورو دار اجتماع مع سيدنا لخلق 12 وكالة حضرية ف12 جهة ولحد الان ما قدراتش تخرج هاد الشي. غير علي هادي بوحدها هي خاصها تستاقل. بلا ما نهدرو علي غياباتها عن الوزارة
بنسعيد ديال البام المكلف بالاتصال والشباب والثقافة. دار بزاف الانشطة واللي خدا المارشي فعدد منهم صحابو. هادا حتى هو خاصو لجنة تقصي الحقائق. جايب دراري صغار كمستشارين. سولوه على السبب الحقيقي لاعفاء المندوب الجهوي للثقافة فطنجة. خاصو يمشي فحالو. راه ما عندوش سياسة ثقافية. عزيز عليه الترفيه. حنا ماشي فحال السعودية ما عندناش فلوس الترفيه
طبعا كاين وزراء خراين خاصهم يمشيو. ف”كود” نكتافيو غير بهاد العينة
