محمد سقراط-كود///
كاينة واحد الواقعة تروى عن عمر بن الخطاب غير موثوق من صحتها. فيها خلاف. هو فاش إحتلت جيوش العرب مدينة الإسكندرية لقاو فيها مكتبة الإسكندرية الشهيرة وفيها أغلب المعارف الإنسانية حتى لداك الوقت، عمرو بن العاص سيفط رسالة لعمر بن الخطاب كيقوليه راه لقينا مكتبة عظيمة فيها كتب من كل العلوم والأجناس، سولوا عمر واش فيها شي حاجة زايدة على لي في القرآن؟ إذن حرقها فلدينا القرآن يكفينا. طبعا كاينة روايات كتقول ان حرقها كان قبل وصول المسلمين وما كاينة علاقة بعمر بن الخطاب بيها. ما علينا أنا نيت حاليا يقولوليا راه كاين معرض دولي للكتاب في الرباط غادي نجاوب نفس جواب الفاروق عمر، واش فيه شي حاجة مكايناش في الليدو أو مايقدروش صحاب الليدو يحضروها؟ إذن فليذهب الى الجحيم لدينا الليدو يكفينا، وراه بصح العلم كلو كاين في الليدو وبأرخص الأثمان طبعا كاين نسخ مزورة ولكن راه هذا هو العالم الثالت أخاي كنلبسو حوايج مدرحين كنعيشو حياة مدرحة كنتفرجوا في الأفلام فابور في الأنترنيت مكنخلصو حتى حاجة، العالم اللأول كيخلص علينا، من بعد ماخدى لينا باش كان يمكن نخلصوا على راسنا.
الليدو هو جوطية ديال الكتب المستعملة والجديدة في مدينة فاس، تقدر تلقى أي كتاب بغيتي وحتى إلي مالقيتيهش يصاوبوه ليك داك الساعة، جنة للقراء بأثمنة جد مناسبة وبخسة بعد المرات، ومع جا في الطريق لجامعة ظهر المهراز أغلب الطلبة منو كيتقداو وفيه ناس مختصين أي كتاب غابر راه يحضروه ليك وخصوصا في المراجع العلمية، وحتى اللغات كاين لي مختص في اللغة الألمانية أما لونكلي والفرونسي موجودة وديما بأثمنة مناسبة جدا، طبعا داكشي فيه نوعا ما إنتهاك لحقوق المؤلف ولكن بالنسبة ليا وفي دولة معدل القرائة فيها جد هزيل فراه كان خاص الدولة تدعم الكتوبة بحال في مصر، وعلاش لا نشوفوا حتى حنا في المغرب شي مشروع بحال ديال سوزان مبارك الله يذكرها بيخير لترجمة الأعمال العالمية وتباع بثمن مناسب.
كاين كتوبة حاليا في معرض الكتاب أنا شريتهم من الليدو قبل مايتعرضو في المعرض وأغلبهم بنصف الثمن أو أقل كاع، حقا المعرض كيجيب عناوين جديدة ونسخ جميلة ولكن أنا باغي غير نقرى ماباغيش نخزن، والأثمنة مبالغ فيها بزاف رواية ديال كاتب مكيعرفو حد ب150 درهم مالنا أودي قيمة كيلو ديال الكفتة بالبصلة وماطيشة وبراد ديال أتاي في سبعطاش، القارئ الفرنسي مثلا كيستافد من دعم الدولة للكلاسيكيات لي دازت عليها مية عام ومابقات فيها حقوق، بينما العرب باقين باغين يستغلوا الأسماء واخا ماتت قرون هادي، دون كيخوت ولات واصلة ثمن فلكي، راه سيرفانتيس كون كانت عندو ميتين درهم في جيبو مكانش يكتبها أصلا، مثلا المنفلوطي مات هادي قرن وزمارة لاش غادي يتباع كتابو بخمسين درهم وتسعين درهم وهو براسو غير ناقلوا شوية دالمنطق، تشجيع القرائة في المغرب مكافيش بنقل المعرض من كازا للرباط خاص تشجيع حقيقي على القرائة أما المعرض أو غيره من ديما كتلقى الجودة والتنوع عند العراقيين والمصريين يخطاونا نحن القراء بالعربية راه نرجعوا ألف عام اللور.
