سهام البارودي- كود//
واحد السكيتش قديم ديال حنان الفاضلي كاتهضر فيه على المغرب كون نظم المونديال ( ديال 2006) و جاو ليه السبليونيات و البرازيليات بالشويرطات باش يشجعو المنتخبات ديالهم و كيفاش المغاربة كايبقاو حالين فيهم فمهم … حنان الفاضيلي ديك الساعة تخايلات غير حلان الفم ماتخايلاتش التحرش و الهمجية لي يمكن يتعرضو ليها هاد المشجعات فحالي تعرضات ليهم البنت لي فطنجة مؤخرا.
انا شخصيا كمرأة مغربية عايشة فأوروبا فراه فاش كانشوف فحال دوك الڤيديوات ف2024، كانتأسف للوضع لي كايعيشو فيه العيالات فالمغرب و لكن فنفس الوقت كانحمد الله و نشكرو على نعمة أوروبا، و كانتأكد بلي خديت القرار الصحيح نهار قررت نمشي فحالاتي ! الله على نعمة العيش في بلدان لي المرا فيهم محترمة بقوة القانون أولا و بالثقافة د البلاد و المجتمع ثانيا، كانخرج فين مابغيت و نمشي فين مابغيت و نلبس لي بغيت، نقدر نلبس شورط و نخرج نجري فالغابة بلا مانخاف من الاغتصاب و التحرش، غير هادي بعدا راه نعمة ما بعدها نعمة ! تبغي تشريها بالفلوس فالمغرب و ماتلقاهاش.
السبليون و البرتغال لي غانظمو معاهم المونديال، فيهم العيالات كايعومو فالبحر بلا سوتيامات وسط الرجال و العائلات و الدراري الصغار بشكل عادي متصالحين مع جسد المرأة، و فيهم المرا كاتمتع بكامل الحرية ديالها، و ماشي غير السبليون و البرتغال حتى بزاف ديال الدول اللاتينية و الافريقية الفقيرة ماعندهمش هاد المشكل لي عند المغاربة مع جسد المرأة، تخايل معايا انه المرا فالكاميرون و الغابون و الكوت ديفوار كاتمتع بحرية اللبس اكثر من المرا المغربية، هادوك الدول لي بعض المغاربة كايعتابرو راسهم احسن منهم، هادوك الدول و ماغاتشوفش فيها اعتداءات على جسد المرأة بالشكل لي كانشوفوه فالمغرب.
فكيفاش غادي ينظم المغرب المونديال و يستقبل النساء من جميع البلدان و يوفر ليهم اجواء احتفالية جميلة الى ماكانش قادر يحمي بناتو من التحرش و الهمجية ديال مجتمع الهاء ( الهايش مايش) ؟ واش ولينا حنا هوما مصر لي مشهورين بالتحرش ؟ حيت هاداك الفيديو لي خرج فطنجة راه كايبان فحالا مصور فميدان التحرير فالقاهرة.
بزاف ديال الكبت و الوسخ و الضسارة و قلة الترابي.
باش غاينفعونا التيرانات الزوينين و الديزاين و الاشهارات و البراق و الموروكومول اكبر مول فافريقيا و هالا هالا هالا مغاربة سبوعة و رجالة لا غدا صدقنا فشي شوهة عالمية ديال التحرش بالمشجعات فالمونديال ؟
