كود علي الصافي العيون ///
بيان فضيحة دارتو الممثلة والمخرجة ويمكن كتكتب الشعر گاع ماجدة بنكيران على تداعيات الفيلم الوثائقي “زوايا الصحراء زوايا الوطن” اللي هدر على سيدي احمد الرگيبي جاب شي متدخل قال باللي هادا يمكن يكون عاگر.
علاش بيان فيه مشكل؟ لان لالة المخرجة تهربات من المسؤولية. سمعو اش قالت فالبيان “التقصير في التدقيق في هذه المسألة كان من المفروض أن تتحمل مسؤوليته جميع الاطراف المتدخلة في إنجاز هذا العمل”. يعني المنتج وكاتب السيناريو والمركز السينمائي المغربي ولجان الدعم ومدراء البرمجة فالمهرجانات اللي ختارتو…. وزادت الممثلة المخرجة الكاتبة “مسؤوليتي تقتصر على الجانب الفني والتقني فقط”. اييه شكون قالها ليك. انتي المخرجة وبغيتي تلوحي المسؤولية فالمقال الاول للسينارسيت عامر الشرقي والمنتج ادريس لمريني؟ علاش درتيهم فاول البيان ديالك. كتقولي للجميع ها مالين الزبلة.
انتي المسؤولة الاولى والاخيرة على فيلم انتي موقعاه. ما قادراش على الاخراج بعدي منو. بقاي فالتمثيل. واخا حتى هاد الشي راه مستواك دون المتوسط لا فالسينما ولا فالتلفزيون.
يا لالة المخرجة راه ما كاينش شي حاجة فافلام وثائقية او تخييلية فيها “عالجت فنيا في موضوع هذا الشريط قضية فكرية وثقافية مرتبطة بمكانة الزوايا وشيوخها لدينا وأهميتهم ودورهم المميز في إرساء وتثبيت دعائم وحدة الدين والوطن .
وان ما تسرب في مداخلة الشاهد ( الاستاذ الباحث ) من تصريح نجمت عنه إساءة لرمز من رموز هذه الزوايا لم يكن بأية نية مسبقة المس بمكانته ورمزيته”. وتزيدي “مسؤوليتي فنية وتقنية”.
هاداك الاعتذار ديالك ما مقبولش الا ايلى تحملتي المسؤولية اولا. ما يمكنش شي حد يعتاذر ونفس البيان يقول هاد الجملة ديال “مسؤوليتي فنية وتقنية”.
نصيحة. خاص هاد الدعم للافلام الوثائقية عن الصحرا نساليو معاه. يتقدم بحالو بحال اي عمل سينمائي للجنة الدعم. ما يمكنش يكون قسم خاص بيه. بهاد الطريقة ما يبقاوش عندنا مخرج =مخرجة= بحال ماجدة بنكيران. انتي كضري القضايا لكبيرة بهاد التملص ديالك.
ما عندكش الشجاعة بعدي على السينما. بعدي علي الابداع. بعدي على ركوب الموجة
