سهام البارودي – كود//
كاين شي وحدين كايحطو واحد الهالة د القداسة على “ناس زمان” و فينما بان ليهم شي شباني كايهضر كايجلسو يتصنطو ليه و يعطيوه ودنيهم زعما كاياخدو الحكمة من عندو ! بينما فالواقع كون كانو ناس زمان مطفرينو گاعما يتمرمدو الاجيال لي موراهم و گاعما يكون المغرب هوا المغرب !
شكون هوما اصلا هاد ناس زمان واش كان عندهم ؟! ياك كانت نسبة الأمية طالعة السقف، بنادم كايمرض كايمشي عند الفقيه يسبب ليه و لا كايمشي لشي سيد يزور، العيالات ماقاريات ماخدامات كايدوزو حياتهم كاملة فالكشّينة، و الرجال الواعر فيهم كايدوز حياتو كاملة فنفس الدوّار ماكايصول ماكايجول ماكايعرف الدنيا شنو فيها ! الاغلبية الساحقة لي تزاد فشي بلاصة كايبقى فيها حتى كايدي مول الامانة امانتو ! حياة رتيبة و مملة و خالية من التجارب الجديدة داكشي علاش بقا المغرب يئن تحت وطئة التخلف قرون و قرون (و زوينة هاد يئن) ! حيت فالوقت لي ناس زمان فأوروبا و أمريكا كانو كايخلقو النهضة الثقافية و الصناعية ، و كايصنعو البواخر باش يستكشفو العالم و كايختارعو و يصنعو و يحطو يديهم على الثروات الطبيعية و البشرية ناس زمان ديالنا كانو عاطينها للبرارد ديال اتاي و الهضرة الخاوية و الامثلة فحال ” ماحد ليتيمة تبكي و ربي يزيدها ” !
في المقابل، الجيل ديال دابا جيل قافز، ولاد اليوم احسن جيل داز فالمغرب، جيل وصل لنصف نهائي كاس العالم، جيل التجارة الاليكترونية، جيل كبسو كبسو و الملاين داخلة فالتيكطوك و اليوتوب، جيل كايحارب الفقر بجميع الطرق، جيل طموح، جيل عندو الشجاعة باش يعيش الحياة كيما بغاها، كايسافر و يصول و يجول فالعالم، كاين لي قطع افريقيا كاملة ببشكليطة، جيل قافز ماكايرضاش يعيش عيشة الذبانة فالبطانة و الاغلبية الساحقة باغا تصوڤي ! دري عندو ثلاتين العام من الجيل الجديد دوز حياة عادية غاتلقاه عندو تجربة و خبرة فالحياة و فالناس اكثر من بَاه فاش كان فنفس السن ديالو ! غاتلقاه سافر اكثر من باه و اخدم اكثر من باه و عاش تجارب انسانية اغنى من التجارب لي عاشها باه فاش كان فنفس السن ديالو ! كلا اكل متنوع على باه و شاف ناس اكثر من باه و صاگ حديد احسن و اكثر من بّاه ! و راكم تجربة كبيرة بزاف على ديال بّاه واخا يكون باه عندو سبعين عام ، هاد الجيل قاري على الاجيال لي فاتوه و اكثر طموح و شجاعة منّو !
و طبعا هادي راها مسألة طبيعية و عادية و هي لي خاصها تكون و لكن كاينين شي اصوات عزيز عليهم يغمقو علينا بديك الهضرة ديال ” قالو ناس زمان” و “الامثلة د ناس زمان” و “الحكمة د ناس زمان” آشمن حكمة كانت عندهم كون كانو مطفرينو گاعما يكون المغرب مرمد و يتمرمدو فيه الاجيال الجديدة !