محمد سقراط-كود///
حاليا المغرب وخصوصا من ورا كاس العالم تحول لتراند من ناحية الزيارة والتوثيق خصوصا فيديوات تيك توك، وبزاف ديال التيكتوكر المشارقة الرحالة جاو للمغرب ووثقوا هاد الزيارات بفيديوات زوينة بزاف كتعرف بالثقافة المغربية وبهاد البلاد الزوينة الساحرة، غير هو راه خاص الإخوة المشارقة يعرفو بلي المغرب راه دولة قديمة وعريقة وعندها جذور في التاريخ وكانت تعتبر جنة حقيقية في عصور خلت، حيت أغلب الفيديوات لي كنشوف ديال رحالة مشاهير مشارقة أي حجرة قديمة شافوها كينسبوها للأندلسيين، وبالنسبة ليهم المغرب بحال الى كان غير خلى خاوي والناس فيه عايشين بحال انسان ايغود حتى جرات إيزابيلا على الأندلسيين عاد بدات الحضارة والإزدهار والمعمار في المغرب، أما قبل من هادشي كانوا غير النوايل في المغرب.
المغاربة هوما لي بناو الأندلس ونقلوا ليها حضارتهم ماشي العكس، والتاريخ المغربي راه قبل من الأندلس وقبل من مولاي دريس، يكفي تمشي زيارة لضريح مولاي دريس زرهون مؤسس دولة الأدارسة وغادي تلقى قبالتو مدينة وليلي أعجوبة المدن الحضارية داك الوقت، الناس كانوا عايشين فيها واحد البذح وواحد التقدم خيالي، كانت عندهم مخبزة عامة ومعصرة ديال الزيتون والجاكوزي والحيوانات الأليفة والضارية السبوعة والنمورة، والأرض مضروبة بالفسيفساء هادي قبل من ألفين عام، ولي هي أصلا قبل الرومان كانت مدينة أمازيغية مورية وعاصمة إمبراطورية موريطنية، وجنب العرايش كان ليكسوس لي كانوا كيعتابروها القدماء طرف من الجنة ومن غير هادشي المغرب راه الأندلس جزء منو ماشي هو جزء منها وهادشي لي خاص يعرفوا العرب وحتى المغاربة.
الواقع والتاريخ راه خاص الواحد يكون كيدور في الأندلس وفين ماتبان ليه شي حجرة قديمة يقول شوف شنوا بناو المغاربة هنا وشوفوا حضارة المغاربة وتاريخهم ماشي العكس، وهذا راه موضوع مهم بزاف ، حيث لا يعقل أننا نشوفوا ناس مغاربة وأجانب بحسن نية أو بسوؤها كالسين كينسبوا أي حاجة قديمة وعظيمة للأندلس كأن المغرب كان عبارة على الدشيرة الجهادية كبيرة وصافي، خاص كولشي يتحرك للتعريف بالمغرب الحقيقي التاريخي ماشي المغرب لي المدرح لي معندو تاريخ ولي بدا مع قدوم مولاي دريس ومن بعد موقع فيه والو حتى رجعوا الأندلسيين هربانين من إيزابيلا باش يديرو الحضارة هنا، كأن الإمبراطوريات الأمازيغية المتعاقبة بحال الى معمرها كانت.
