سهام البارودي – كود//
احسن صراع كانتفرج فيه مؤخرا مورا صراع العروش هوا المسلسل الجديد ” صراع بوهبّوش” ! الصراع لي نايض مؤخرا بين الفايد و السلفيين ! هوا كايقوليهم ماكاينينيش العلماء و هوما كايقولو ليه نتا لي ماشي عالم ! داكشي ديال الحمّامّات ! و ناض ليه واحد اللسلاس بولحية كاين فمراكش كايقوليه ” ماعندكث الحق ! ماعندكث الحق تقول ماكاينينث العلماء ” وانا كانتفرج فيهم كل يوم ڤيديو جديد ولاو اكثر من نزار السبيتي فالڤيديوات الهزلية !
وا الصراحة الفايد قال الحق ! دوك الرباعة د السلفيين راه ماشي علماء ! العلماء الحقيقيين راهم مخشيين فاللابوراطوارات كايختارعو لينا اللقاحات و الادوية و كايكتاشفو الحوايج لي يمكن يسهلو علينا الحياة ! العلماء الحقيقيين راهم فلانازا و السيرن و الجامعات الكبيرة فالعالم ! ماشي واحد حافظ كايعرف غا يعاود داكشي لي حفظ ! عن فلان عن فرتلان عن ابي فلان قال … هذا ماشي عالم هذا ! انسان ماكاينتج حتى قيمة مضافة من غير يعاود الهضرة لي تگالت هادي آلاف السنين راه ماشي عالم ! عالم ديالاش ؟ ديال الحزاق ؟ العلم ديالو كامل و داكشي لي حافظو كامل تقدر تهزو غا فكلي يو اس بي ديال جوج جيگا الله يجعل البركة اشمن عالم هذا ؟ الفايد عندو الحق ! و يمكن اول مرة كايقول شي حاجة بعقلها و اول مرة كانتافق معاه !و تاهوا براسو ماشي عالم !
آ سيدي راكم كلكم مسگيين بمغرفة وحدة وانا شخصيا فرحانة نشوفكم مضورين السمطة لبعضياتكم باش توريو لعباد الله الحقيقة ديالكم ! و كيفاش كاتعاملو مع المخالفين ليكم ! هاه ! هانتوما غا بيناتكم لحايا بيناتكم عندكم نفس الخلفية الايديولوجية و شحال و نتوما كاتحبحبو على بعضياتكم و احبك في الله اخي و احبك في الله يا دكتور ! وا ها الحب في الله فين كايسالي ! غاتاكلو بعضياتكم ! ماكرهتوش تنوضو ضاربو كونما كاين المخزن كورا سمعنا شي ” محاولة اغتيال” و لكن الله يعز المخزن !
انا بعدا فهاد الفيلم كانقول دعاء واحد ” اللهم اضرب ولاد الناس بولاد الناس و اخرجنا من بينهم سالمين”
