كود سبور مصطفى الشاذلي ///
لعاب متوسط كان معروف فالبطولة اسمو بيضوضان طلق بغباء واحد العبارة فبرنامج على “شوف تيفي”. لعاب الفتح والرجاء والوداد سابقا٬ قال قبل ما تبدا البطولة باللي “ايت منة رئيس الوداد دار ثورة”. وشوفو الوقاحة. وتبدا البطولة بعدا.
راه الوداد هادي ماشي فرقة اخرى. الوداد اللي حققات بطولات مع سعيد الناصري ما عمر حققاتها مع شي رئيس اخر. وما عمرنا سمعنا امثال بيضوضان قالو باللي الناصري دار ثورة فالوداد. بالنتائج دارها.
ايت منة راه خدا فرقة وكبيرة. موسم واحد كان خايب وما كانت الوداد غادية طيح للقسم الوطني للثاني٬ اللا. جات الخامسة فعام استثنائي. مع اعتقال الرئيس السابق اثر بزاف بزاف على الجو العام. مرحلة مجيد البرناكي كانت مزيانة لانها خلات الوداد عايشة. مرحلة دقيقة بزاف وتفهماتها العائلة الودادية.
دابا مرحلة جديدة جا فيها ايت منة. لعبات فيها ظروف باش يوصل للرئاسة ويحقق هاد لملايري حلمو. يكون رئيس نادي كبير وعريق. راه معجزة ايت منة الوحيدة لحد الان هو اللي حققها هو باش ولى رئيس الحمرا.
نتسناو بداية البطولة. نشوفو اللعب. نتسناو النتائج. باش يسالي الموسم ممكن اي واحد عندو شوية لعقل٬ يدير التقييم.
دابا ايت منة متبع طريق مول الزبل البدراوي اللي جا للرجا كرئيس وعطاها للهدرة وللوعود وفاللخر الخضرا ما طفراتوش. بلا ما نهدرو على مصيرو الان فعكاشة ماشي فعلاقة بالخضرا اللا بعلاقة بشركاتو ديال الزبل.
ايت منة كيسوق كل نهار راه جايب هاد اللعاب ديال مدرسة البارصا. هادا جاي من البرازيل. اوناحي قريب…..خاصو يرد البال بزاف. الوداد راها مدرسة. راه عندها هوية وشخصية معروفة من نهار خرجات للوداد.
خاصو يديها فاللعابة فالفرقة فالفروع الاخرى اللي كانت الوداد فيها فالقمة بحال الباسكيط واليد….. عوض التركيز على تسويق راسو ومعاها راني جبت لعاب راه لاخر قريب.
قضية اوناحي مثلا٬ تم التسويق ليها باللي جاي للوداد. ايلى ما جاش والوداد ما حققاتش النتائج راه جمهور الحمرا ما غاديش يرحمك يا ايت منة.
نهار تبدا البطولة ونشوفو الوداد كيف مورالها هاد الموسم. الاكيد ان حتى فوزو بالبطولة والكاس فاول موسم ليه كرئيس٬ راه ما يمكنش نقولو عليه “دار ثورة”.