كود هناء ابو علي الرباط ///
نهار 19 يونيو 2023 خرجات لائحة تعيينات لقناصل. اللائحة فيها 23 قنصل. الخارجية قالت باللي هاد التعيين جا “إثر دعوة لتقديم طلبات الترشيح في إطار الحركة الانتقالية لسنة 2023 لموظفي الوزارة”.
بغى يقول باللي المعنيين بالامر قدمو طلبات الترشيح. طبعا هاد الشي ما كانش بحال هاكا. الكذبة اللولى هي ان 39 بالمائة من هاد 23 قنصل من النساء. ظاهريا وزير الخارجية ناصر بوريطة كيقول للمغاربة باللي كيدعم لمرا. بلا ما نهدرو على خطاب رئيس الدولة اللي كيهدر على المناصفة ماشي الكوطا وهاد الشي كاين حتى فالدستور٬ غير هادي 38 بالمائة ماشي دقيقة. فيها قنصلات ظلمهم وهمهشهم الوزير. لقى فرصة يبعدهم من الخارجية ويزيد يهينهم.
كيفاش؟ فحياة كل موظف عمومي خاصة فالسلك الديبلوماسي هو ترقى. بدا موظف وتخدم باش تولي رئيس قسم وتقدر تجتاهد كثر وتمشي قنصل وترجع اما سفير او مدير كبير. هاد الشي اللي كاين. غير بوريطة دار العكس. شي قناصلة دوزو هاد البوسط ديال القنصلية ونجحو فيه مرة او جوج وكلشي كان كيتسناهم يتعينو سفير. حقاش بوريطة ما عندوش مع النساء اللي فيدهم٬ رجعهم للخارجية وكاين اللي تعين مدير قبل ما يحيدو ويحطو فالبلاكار واليوم راسلو قنصل. واش كاينة مؤسسات فالبلاد كتراقب هاد لفضايح فالخارجية ولا اللا. واش ما يمكنش لشي رجل دولة يوقف هاد التبرهيش فالديبلوماسية؟
كيفاش هاد الفقرة المهينة للديبلوماسي سواء كان رجل او مرا “وأبرز البلاغ أنه، وفي إطار دينامية الترقية، تم تخصيص 22 في المائة من المناصب لقناصل عامين نجحوا في مهامهم لشغل مناصب قنصلية أكثر استراتيجية أو أكثر أهمية”. دابا فالبلاد اللي على رأسها ديبلوماسي ما عمرو فحياتو كان سفير٬ ولى ايلى خدمتي مزيان فشي قنصلية غادي تولي قنصل. يعني كنتي قنصل مزيان غا تبقى قنصل. فين كاينة هادي
سمعو هادي اللي فنفس السياق واللي داخلة فاهانة هاد الاطر “تابعت الوزارة أنه بغرض الاستفادة المثلى من خبرة قناصل سابقين، فإن 26 في المائة من القناصل العامين المعينين حديثا هم قناصل عامون سابقون راكموا تجربة في تحمل المسؤولية بالمصلحة المركزية أو على مستوى البعثات الدبلوماسية والمراكز القنصلية”
اللي كيديرو بوريطة هو انتقام. هو غباء ديبلوماسي. كيستغل منصبو باش يصفى حساباتو.