محمد سقراط-كود///
هاد اليوماين دزت لواحد الرياض في المدينة القديمة ديال فاس سميتو مدينة سوسيال كلوب، رياض زوين بزاف وكيدير أنشطة ثقافية عندو واحد الطيراس زوينة الهدوء والمنظر والجو الزوين والموسيقى ديال الهيبيين الجدد لي الصراحة كتحسسك بالهدوء وكتخليك تستمتع بالجو، لكن للأسف رغم مثالية الجلسة (الثمن فيه ناقص مقارنة مع باقي البلايص في المدينة وحسن من بزاف منهم وخالي من الأرنكة والتبرزيط) إلى أن أول حاجة فتاقدتها في البلاصة مع الشمس الصافية هو بيرة باردة، البلاصة مثالية لأنك تشرب فيها بيرة باردة مع غير 25 في المية من القطعة ديال لوكوغ دو طونجي وهانتا تحس براسك بحال الى كالس في الجنة، ومزيانة ليا كزبون ومزيانة لصحاب البلاصة، أنا مثلا في داك الجو الزوين شارب كاس ديال أتاي بلا سكر مذاقو كي التراب حيت بلا سكر ب15 درهم ودغية تحركت، بينما كون كانت البيرة على الأقل غادي نشرب ربعة الى كانو ب25 مثلا راه مية درهم هاديك ونقدر نطلب شي قطعة وفي اللخر نعطي تدويرة سخية حيت غادي نكون منغم والسخاوة زايدة وحيت منطقة، عوض الدريهمات القليلة لي كيعطي الواحد في حالة شرب أتاي ولا قهوة، يعني نريح ساعة ونص أو جوج على الأقل غادي نخلي بين 150 و 200 درهم عوض دابا مخلي 20 درهم.
طبعا غادي نتنغم ويعجبني الحال ونولي نحس براسي شارك معاهم في البلاصة وغادي نطلب يحيدو الموسيقى ديال كوثر الفحصي و أوم وباقي موسيقى المشعكين ويطلقو ليا ديدي ديال خالد ونتي ضري ونتي الدوا ديال مامي ولكن هادشي مقبول مقارنة بالرواج الحاصل، وفاش غادي نخرج غادي نكون فرحان ومحيدة مني التغوبيشة لي كاينة في وجوه أغلب المغاربة لي مكيشربوش البيرة، وغادي نولي إجتماعي كثر وحنين ونقدر نتفكر نشري شي بلغة زيوانية للواليد ونشري للواليدة شي بخور فاسي من مولاي دريس،وفاش غادي نتمشى شوية في المدينة غادي يجيني الجوع وغادي ناكل عند دوك المطاعم لي موجهين للسياح وكيبيعو طاجين دو كوسكوس ب120 درهم فيه الأونتغي بشلاظة دالخيزو والباربة والسوغتي بفلان ديال جوج دراهم، وهاد الجريمة لي مستحيل نديرها وأنا ممنغمش وبكامل قوايا العقلية ومع ذلك غادي نبقى فرحان وناشط ، ونقدر نبتاسم فوجوه الناس وغادي نولي محلول كثر وماحاضيش راسي ونقدر نتشفر دغية بالنشل طبعا وهادشي غادي يحرك إقتصاد المدينة إبتداء من الصنايعي مرورا بمول الماكلة وصولا للشفار، هادشي كامل يقدرو يديروه ربعة دالبيرات فقط.
السياحة في المغرب غلطة بدون بيرة وخطيئة بدون نبيذ، وجريمة بدون خمرة معطرة ومحلاة( ترجمة كوكل لكلمة liqueur)،وتفقير ممنهج للمقاولات الصغرى والناشئة وللشباب المقاتل الواعي بدريعة الدين والعادات والتقاليد، أو يكون عندك أوطيل مصنف داك الساعة خود راحتك وشير على عباد الله في الثمن، وهادو غير عادات الليوطي أما المغاربة من ديما كيضربو الطاسة راه كاين باب من أبواب مراكش سميتو باب الرب لي مسمي على مشروب مسكر كانو كيصاوبوه المغاربة وكيبيعوه تم في عهد الموحدين والسعديين والمرينيين باب ديال الروج أبن عمي، حتى لمن بعد عاد المغاربة هترو وبغاو يتنصلو من ثقافتهم وأصلهم، الطاسة راه ركيزة من ركائز السياحة راه بزاف ديال المرفحين المغاربة كيهربو من السياحة في هاد البلاد غير على ود الخنقة والقوانين المقيدة للحريات وعدم توفر الطاسة في أغلب الأماكن، معندها حتى معنى أن تمشي لمطعم زوين فيه شاف مبتكر مقاد بسطيلة ديال الكانار وفي اللخر خاص تدوزها بكاس ديال أتاي عوض تدوزها بالروج حتى هو زوين ويخلق توازن في المستقبلات الحسية في الفم ويخلي تجربة التذوق ألذ وأشهى وأغنى، وهادشي لي كيعيشوه السياح والمغاربة المرفحين في الفنادق والمطاعم المصنفة بينما ولاد باب الله يعانون ومفروض عليهم يضربو البيصر والى بغاو يضربو البيرة خاص يمشيو لدوك البيران لي فيهم الظلام والقطعة بالكلية وريحة البول والكافور خارجة من الطواليط، خاص الدولة تدير عقلها وترجع لينا مغربنا لمقابل الليوطي مغرب النشاط والفرحة والفيجطة والطاسة من مشرق الشمس لمغربها