كود الرباط ///
قبل ما يبدا اليوم الخميس 14 دجنبر 2023 وزير خارجية اسبانيا خوسي مانويل الباريس زيارتو الاولى لدولة خارج بلادو منذ تشكيل الحكومة الجديدة، دار حوار مع وكالة المغرب العربي للأنباء. هدر على “الطابع متعدد الأبعاد” للشراكة القائمة بين بلاده والمغرب.
ودار “تقييم إيجابي للغاية” لخارطة الطريق المعتمدة بين البلدين في أبريل 2022 اي نهار زارنا سانشيث رئيس حكومتهم.
واكد باللي دابا غاديين يعاودو يطلقو “الأجندة أو خارطة الطريق متعددة الأبعاد التي قمنا بإرسائها”
هدر على ان المغرب والصبليون “مثال يحتذى في مجالات مكافحة مافيا الاتجار بالبشر ومكافحة الإرهاب”.
البيزنس خدام مزيان وزاد “الأهم من ذلك أننا عززنا العلاقات السياسية والإنسانية أكثر من أي وقت مضى خلال السنوات السابقة. وبالنسبة لي، هذه هي الأسس التي نبني عليها اليوم علاقة الشراكة الاستراتيجية هاته”.
لكن هاد لكلام كيتناقض بشكل كبير مع تصرفات قنصلياتهم غالبا. حسب شهادات جمعاتها “كود” كاين مواطنين فقنصلياتهم فالمغرب حطو ليهم باسبورات على حساب الفيزا هادي شهر ونص وما ردوش عليهم. مصدر آخر قال ل”كود” باللي شهرين وهو يتسنى.
لفضيحة انو فهادو ماشي غير مواطنين باغيين يمشيو يفوجو عندهم ويخسروا فلوس عندهم، كاين حتى شي حالات عندهم ما يدار سواء مع مؤسسات عمومية او خاصة إسبانية
دابا حسب شهادات جابتها “كود” ففرانسا وفعز الأزمة معاهم كانو كيجاوبو لمغاربة فأسبوع او عشرة ايام. هادو اللي كيهدر وزير خارجيتهم على علاقات واعرة ومدخل الإنساني، واللي كيرأسها وزير اشتراكي متحالف مع اليسار الراديكالي، كيتصرفو قناصلتهم تصرف غريب.
كيفاش يحتاجزو جوازات سفر مغاربة شهر ونص او شهرين واللي جاتو شي مهمة فبلاد ما محتاجاش الفيزا كيقولو ليه “ما نردو ليك والو” “غادي تبدّا من الزيرو”
طبعا بوريطة ما عمرو يدافع على هاد العينة من المغاربة، خاص الحكومة من غير بوريطة اللي تجبد هاد الموضوع