كود هناء ابو علي ///
سفير فرانسا فالرباط كريستوف لوكوتريي كيضحك على لمغاربة. كيطنز عليهم. خرج ف”تيل كيل” باش يقول باللي التوصية التي تبناها البرلمان الأوروبي حول حرية الصحافة في المغرب “لا تلزم أبدا فرنسا”.
بصاح بصاح. ما حشمتيش. وشكون ورا هاد التوصية. شكون الحزب اللي وصلها للبرلمان الاوربي؟ ماشي حزب ماكرون. حزب الرئيس الفرنسي اللي جابك انت لهاد المنصب. كيفاش لا تلزم ابدا فرنسا وفرنسا هي مولاتها. سير ضحك على غيرنا.
لوكوتوريي قال ل”تيل كيل”فاخر عدد ليها “حنا مسؤولين على قرارات السلطات الفرنسية، أما البرلمان الأوروبي فبعيد عن سلطتنا والأمر يتعلق بشخصيات منتخبة”. شوفو الطنز كيف داير. نواب حزب الرئيس كيوليو شخصيات مستقلة منتخبة فالبرلمان الاوربي. قلت ليكم كيطنز علي المغرب وعلى لمغاربة. اييه الحكومة الفرنسية ماشي مسؤولة على البرلمايين الاوربيين كيف قلتي ولكن مسؤولة على نواب حزب الرئيس. صحاب ماكرون صوتو على هاد القرار اللي عندو علاقة بحرية الصحافة.
كون خرج البرلمان الاوربي هاد القرار باش تعتاقل بوعشرين توفيق وسليمان الريسوني وعمر الراضي كون كان القرار متفهم. دابا بوعشرين دوز ثلث المدة والريسوني كثر من نص المدة بحالو بحال الراضي. يعني ماشي لا الوقت مناسب لهاد القرار ولا غادي يبدل شي حاجة فهاد القضية المغربية المغربية.
ماكرون قال لصحابو ديرو قرار يدين بلادنا باش يضغط ماشي حب فحرية التعبير وقال لسفيرو فالرباط: قول للمغاربة هدرة كلها طنيز.
المغرب عندو ازمة مع ماكرون و”ذو ايكونومسيت” شرحات هاد الازمة. دابا ماكرون هدفو ماشي غير يدعم الجزائر بل يحاصر المغرب. يعني راها شكل من اشكال الحرب ضدنا