محمد سقراط-كود///
المغرب عمرو غادي يكون بلاد سياحية حيت السياحة كتمشي مع الحريات والطاسة والنشاط، هاهي الصبليون غير حدانا قريب توصل ل مية مليون سائح وكتدخل غير من السياحة تقريبا قد الناتج الداخلي الخام ديال المغرب كامل بالفوسفاط ديالو بفلاحتو بالتصدير بصناعة السيارات بكولشي، علاش اسبانيا كتعرف نجاح خيالي للسياحة بينما المغرب غير حداها فاشل وباقي مارصلش حتى لعشرين مليون سائح علما انه كيحسب حتى الجالية المغربية فاش كيدخلوا للبلاد كسياح، وعلما انه كاين المشترك كثير بين المغرب والصبليون؟ السبب بسيط وواضح وهو علمانية الدولة الإسبانية وانفتاحها وانفتاح شعبها على الثقافات وهامش الحريات الكبير في البلاد، والطاسة والنشاط والماكلة والموسيقى فين مانشيتي.
المغرب مقارنة بإسبانيا بلاد كئيبة متزمتة منغلقة على ذاتها، ناسها محافظين كيتحلو بالفلوس ولكن يرافق هذا الانفتاح بزاف ديال تأنيب الضمير، شوف غير الحبس في المغرب شحال فيه من مغربي خرج نشط مع اجنبي وسكر ومارس معاه الجنس وفي الصباح أنبوا الضمير كيقتلوا ويشفروا ويزيد، وحتى القوانين وتدخل الدولة في تدين المواطن وطريقة عيشه كتخلي الكئابة والبؤس هو عنوان البلاد، اييه كاين النشاط في المدن الكبرى نسبيا ولكنه كيتقام غالي وفئوي وغير محمي بالقانون، واخا نتا ناشط خاصك ترد البال حيت القانون ضدك ماشي معاك.
باش المغرب يتطور سياحيا أولا خاص الدولة تدخل سوق راسها ماشغلهاش واش يصومو المغاربة رمضان او يفطرو واش يمارسو الجنس مع الأغيار أو الأمثال او بعقد زواج او بدونه، ماشغلهاش واش يسكرو المغاربة او يشربو الحليب باللويزة وينعسو، وخاص إعطاء رخص لأكشاك على شكل شرينگيطو في اغلب شواطئ المملكة تكون فيه البيرة والطاسة بثمن رمزي، وخاص تفرض القطعة مجانية على جميع حانات المملكة، وخاص تغيير القوانين لي كتقيد الحريات وخلق مناخ حقيقي ديال الاستثمار في معزل على قوة البيروقراطية وتدخل الدولة، راه والله حتى عيب وعار دولة بحال المغرب بجميع مؤهلاتها السياحية والجغرافية وموقعها وسط الكرة الارضية ومع ذلك ماتقدرش حتى تنافس متحف اللوفر في فرنسا.