محمد سقراط-كود///
في الألفينات بدات الهدرة على رقمنة وتحديث وهيكلة القطاعات في المغرب، وبحال ديما كتكون الوعود كبيرة والنتيجة مخيبة، وكتدوز سنوات حتى كيسيطر الإحباط على المغاربة عاد كتخرج شي لعيبة بسيطة كتبان كإنجاز كبير، بحال أنك تطلب السجل العدلي رقميا أو عقد الازدياد، ولكن عموما البلاد متخلفة رقميا والموشكيل الأكبر هو الدول المجاورة ولي عندها معانا نفس اللون والدين والجنس متخلفة كثر منا، كنبانوا حداها حنا راه هوما هونك كونك، ولكن في الواقع حنا راه باقين حاصلين في التسعينات، يكفي أن التعامل بالكاش باقي هو السائد في كل القطاعات من غير، كارط گيشي فقط تخلص بيها في الأسواق الكبرى وبعض المطاعم الفاخرة، بينما دول أخرى راه كنا كنشوفوا فيها متخلفة علينا كتلقاها رقميا متطورة وبزاف، راه الصومال وكتخلص غير بالتيليفون، إثيوبيا خلاص دولة بصح مشات بعيد، دول شرق آسيا راه لي حاضية الطواليط كتخلص بكارط كيشي او بالكود كيو آر.
الرقمنة كتعني السلاسة والسهولة والبساطة في الحياة، إنك تنزل في المطار تشري ايكارد باشتراك فقط للمدة لي غادي تبقى فيها في البلاد، من بعد تكري طوموبيل او تاخد طاكسي او شيفور لي يوصلك غير من تطبيق وتخلصو رقميا، من بعد تلقى راسك كتعامل غير بالتيليفون في أيتهما حاجة، تشري تيكيت لمسرح او حديقة ألعاب أو تيلفريك أو أي وسيلة نقل فقط من موقع في الإنترنيت، ويكونوا تحفيزات بحال أنك إلى خديتي تيكيت من الإنترنيت مكتشدش الصف والثمن كيكون ناقص، جميع المعلومات على أيتها حاجة في البلاد كتلقاها غير في الإنترنيت، حنا في المغرب راه بصح متخلفين وبزاف، كتاخد غير ايندرايف كتلقى راسك في مطاردة بحال الأفلام تابعينك الصقور ديال الطاكسيات وفاش يبراكيوك يحطو الفيديو في الصفحة ديالهم وفي كروبات الواتساب، وحتى البوليس يجيو يوقفوك ويسولوك شكون هذا، ويديوه للفوريان.
المغرب غادي ينظم كاس افريقيا وكاس العالم، راه من التخلف أنه يبقى كيتعامل بالكاش ومانع تطبيقات النقل ومصعب الحياة على المواطنين والزائرين، في الوقت لي دول أخرى كنا كنظنو أنها متخلفة علينا مشات بعيد في الرقمنة، وسهلات حياة الناس وسرعتها، المغرب باقي لاصق في النظام القديم ديال خاص تمشي برجليك وتهز الطوموبيل او توقف منشور في الشارع تشير لطاكسي ياخدك فين بغا هو، وتبدى تقلب فين تسطالي، ونزل وشد الصف وتسنى السيستيم باش تدير عملية بنكية او تخرج ورقة من إدارة او تشد موعد نص العالم كيدير هادشي غير بالإنترنيت دابا هادي كثر من عشرين عام، خاص المغرب ينقل تجربة الدفع بالكود “كيو آر” بحال لي دايرين دول كثيرة في اسيا والعالم، وراها قديمة وماشي شي علم معقد مادام أن الهنود دايرينها، راه خاص تكون من إيجابيات أننا نظموا كاس إفريقيا وكأس العالم أننا ندخلوا للرقمنة الحقيقية، مايمكنش يجي واحد من الصومال ويلقى البلاد متخلفة رقميا فيها غير الحيوط والشوانط لي جداد.